Ha ki 3 snem ka jingtreikam u President sa tang T. 28,90,000 ka pisa ba sah

Jowai, K’lyngkot 30: U ma Balen Thubru uwei na ki trai trok ha ka sngi Thohdieng ha ka jingïakren sha ki lad pathai khubor ha Mihmyntdu By-pass West Jaiñtia Hills, u la pynshai ïa ka jingkynnoh jong u President ka Jaiñtia Hills Truck Owners’ Association (JHTOA) u ma Biangshwa Shylla kaba long pyrshah ïa u.
U ma Balen Thubru ula ïathuh ha ka 27 tarik u Kyllalyngkot utei u President ula khot pynlong ïa ka jingïalang da kaba thung tang 5 ngut ki nongkren ha katei ka sngi, hynrei kum u trai trok u ma Balen ula pan jubab ha ka jingïalang hynrei ula shah weng bad ym shym la ai lad satia ïa u ban kren da kaba kheiñ ba um long u member jong ka Association bad kumta ka la mih ka jing ïania kaba jur.
U la pynshai da kaba ong, “Kumno um shym la kheiñ member haba man ka sngi ki kali jong u ki mih ban leit kit ïa ki mar da ka slip jong ka Association, hynrei kumno pat u khlem ithuh ïa ia nga,” ong ma Balen. U kwah ruh ban pynshai halor ka jingkynnoh ba u ma Balen ula thaw bun ki Association, da kaba pynshai ïa kane ka nongrim jong u ka long ban ïeng na kaba bynta ka bha ka miat jong ki trai trok ban dawa pynkiew ïa ka bai kali na ki karkhana da kaba ïasnohkti lang bad ka MCTODA.
Ula pynsngew hadien ba la dep seng ïa ka Joint Action Committee kaba kynthup lang ïa ki seng bapher bapher jong ki trok ban ïakhih ïa ka hok na ki karkhana, la thung Chairman ïa u ma Biangshwa Shylla bad tang katto katne sngi ula shet kylla da kaba weng noh ïa kane ka kam Chairman, hynrei da ka jingïatreilang bad ka MCTODA la ïatrei shitom ban dawa pynkiew bai kali na ki karkhana.
Hynrei kaba sngewsih pat ka long ha ka por ba dang ïakhih utei u President ula pynsngew paidbah pynban ba kane ka jingïakhih jong ki ka la pynduh nong pynban ïa u, kumta u ma Balen ula pynrem jur halor kano ka nongrim ba u duhnong, “Lada um dei u Agent jong ki Company, kumno u nud ban pynpaw ka jingduhnong bad kane ka paw ba u dei shisha u Agent ki karkhana,” ong u Bah Balen.
Ha kaba ïadei bad ka report jingkheiñ jingdiah jong ka seng na ka liang utei u President ma Biangshwa Shylla ha ka 27 tarik ula pynsngew la kumno kumno haduh 40 tylli ki kali ha ka shisngi kiba ïoh rung sha ki karkhana ban kit mar bad ka bai slip ka long 150 tyngka kawei lada kheiñ ha ka shisnem ka long 14,600 hajar tylli bad ka pisa ka poi T.21,90,000 tyngka, haba kheiñ hapoh lai snem ka jingtreikam jong u kum u President ka pisa kan poi T.65,70,000 tyngka.
Katba jingpynlut pynsep kumba la ïathuh da u President ka bai nongtrei na ka bynta ar ngut ha ka dor 15,000 hajar uwei haba khieñ ha ki lai snem ka long T.10,80,000 tyngka, ka pisa ba thied jaka 16 lak tyngka nalor kiwei de bad ka pisa ba dang sah na ka (collection) ka long T.28,90,000 tyngka. Na ka liang u ma Balen u kwah ban ïoh jingshai shuh shuh ïa kane.
Halor ka jingkynnoh jong u ïa ka kam President u ma Balen Thubru ha ki por mynshwa ba um shym la treikam la 15 snem, u ma Balen u pynshai ïa kane ha ka por ba u long President u ma Biangshwa u dang long tang u khynnah bad ki paidbah ki ïohi ïa ki kam ba bha jong u ha ka imlang sahlang wat ha ki jingïalang bunsien u pyllut nalade hi.
Ha kaba ïadei bad ka jingkam u President ma Biangshwa Shylla ba ka Association ka ïaid katkum ka Constitution hynrei na ka liang ki trai kali kim shym la ïohi ïa kata ka Constitution kaba la shna tang katto katne ngut.
Shuh shuh u ma Balen Thubru u kwah ban pynsngew ba ka jingïalang kala dep shim ïa ka rai ba ha ka 3 tarik Rymphang kin pynlong ïa ka General Meeting ha 7-Mer Toll Gate haka por 11 baje mynstep na ka bynta ban pynshai ïa ki kam ba dangsah, lada u President um lah ban wan na ka liang ka jingïalang kan jied hi ïa u President ba thymmai bad la kyrpad ïa baroh naduh ki trai trok bad ki nongñiah ba kin wan sha katei ka jingïalang.