Shillong, Nailur 08: Ka Joint Action Committee (JAC) kaba la thaw ban pyrshah ïa ka jingthmu ka sorkar ban buh ïa ka ktem khalai Casino ha Ribhoi ki la leit ban ïa kynduh ïa u Myntri Rangbah ka jylla ha ka sngi Palei ban pynpaw ba na ka liang jong ki kim pdiang satia ïa kane ka jingthmu ka sorkar. Ha kane ka JAC la ïa don lang ki Khlieh Nongsynnshar Shnong, ki kynhun seng bhalang ba kynthup ïa ka KSU, HNYF, FKJGP.
Haba ïakren bad ki lad pathai khubor, u Secretary jong ka JAC uba dei ruh u President ka KSU North Khasi Hills u Samla Ferdinand Kharkamni u la ong ba na ka liang u Myntri Rangbah ha ka jingïakren bad ki dkhot ka JAC u la ai ka jingkular ban pynsah ngeh noh shuwa ïa kane ka jingplie ïa ka ktem khalai namar ka jingmih ki jingpyrshah na kiba bun balang.
“Ha ka jingïakynduh jong ngi ban pynpaw ïa kane ka jingpyrshah u Myntri Rangbah u la pyntip ba na ka liang ka sorkar kan ym ïaid shakhmat ban plie ïa ki casino na ka daw ki jingpyrshah jong kiba bun ki seng bad ki paidbah ka jylla, kynthup ruh wat ki nongïalam niam u la ong.
U la ong ba ka lada ka sorkar ban pynmih ïa kine ki jingïakhalai casino kan ktah ïa ka jingsngew jong ki nongshong shnong ka jylla Meghalaya bad ka jingsngew ki nongïalam niam bapher bapher.
U la ong ruh ba ka jingdon jong ki Casino kan sa wanrah ïa ka rukom im kaba shyrkhei, bad ruh kan sa pynkha ïa kiba bun ki kam be-aiñ bad kan awria hapdeng ki khun samla jong ka jylla.
“Ban ïa kaba pynlong ïa ka Meghalaya kum ka ktem khalai bad ka pdeng ki kam awria, ka sorkar ka dei ban kham ban pynleit jingmut ha ka pule puthi, ki jingïalehkai bad kumta ter ter, kiba wanrah ïa ka jingbha ha ki khynnah samla bad ha ka jylla hi baroh kawei,” u la bynrap
