Ha kano ka kyndon ka 6th Scheduled la ailad ïa ka Sorkar ban siew tulop ïa ki ADC: HYC

0

Shillong, Nailar 27: U President ka HYC sengkmie u Bah Roy Kupar Synrem u la pan ka jingpynshai na ka Sorkar jylla bad khamtam eh na u Myntri Rangbah ka jylla u Conrad K Sangma ba ha kano ka kyndon jong ka 6th Scheduled ka riti synshar ka Ri India ba ka la shah ïa ka Sorkar jylla ba kan siew tulop hi noh ïa ki nongtrei jong baroh 3 tylli ki Autonomous District Council kiba don ha ka jylla.
U Bah Roy u la pynpaw ruh ka jingkwah ban tip la ka Sorkar ka don jingthmu ne em ban pynduh noh ïa ka jinglong autonomy ne jinglong laitluid ba kyrpang jong ki ADC ba kin pyntyllun hi ïa la ki jong ki kam bad hato ka Sorkar ka kwah ban knieh noh ïa baroh ki bhah khajna jong ki ADC ba ki la ïoh lyngba ki marpoh khyndew.
Une u nongïalam ka HYC u la pan ïa kine ki jingpynshai hadien ba la ïohi lyngba ki lad pathai khubor ba ka Sorkar jylla ha ka sngi nyngkong ka la shim ïa kane ka rai ban siew tulop hi ïa baroh ki nongtrei jong baroh ki ADC.
Haba kren sha ki lad pathai khubor ha ka sngi baar u Bah Synrem u la buh ruh ka jingkylli ba nangno ka Sorkar jylla ka ïoh pisa ban siew ïa kane ka tulop naba tang ha Garo Hills Autonomous District Council ban siew tulop ïa ki nongtrei kiba khlem ïoh tulop mynta la 43 bnai kan poi kumba T. 70 klur katba ki jingpynmih pisa ka GHADC ka long tang T. 30 klur ha ka shisnem.
U nongïalam ka HYC u la pynpaw ruh da kaba ong ba lehse kane ka jingrai kyrkieh ka sorkar ka don ka jingthmu ban myntoi saiñ pyrthei namar ka elekshon ha GHADC ka la dei ban long ha u snem ban wan, kumta u la pan ka jingpynshai na ka Sorkar halor kane ka jingthmu ka Sorkar jylla bad kylli ruh la ka Sorkar ka mut ban siew tang ïa ki nongtrei ne wat ïa ki MDC bad ki Executive Member ki ADC ruh kumjuh.
U Bah Roy u la buh ruh ka jingkylli ba ka sorkar ka ïoh pisa naei ban siew ïa ka tulop jong baroh ki ADC bad lada ka sorkar ka siew tulop kaei pat ka kam ba kine ki Council kin trei. “Ha kaba khatduh khlem pep ka sorkar kan sa shim hi na ka bhah marpoh khyndew ki ADC ban siew ïa kaei kaba ka la pynlut,” ong u Bah Roy da kaba bynrap ba lada ka sorkar ka la tuklar ïa ki kam jong ki ADC kan lam sha ka jingthmu ruh kaba lah ban pynduhnoh wat ïa ki ADC ha ka jylla.
U la ong ba katkum ka 6th Scheduled jong ka riti synshar ka ri la ailad ïa ki ADC ba kin pynmih hi ïa la ki jong ki khajna bad ban siew tulop ïa ki nongtrei bad na ka liang ka sorkar ka dei ban shu pyllait beit ïa ka bhah kaba ki dei ban ïoh na ki marpoh khyndew.
“Ngi la ïohi ha ki por ba la leit ba ki sorkar kiba don ha ka bor ki shait bat ne pynslem ban pyllait ïa ka bhah pisa sha ki ADC khamtam kiba la synshar da kiwei pat ki party ki bym donlang hapoh ka party ba bat ïa u lakam synshar ha ka sorkar bad ïa kito ki ADC pat kiba la synshar da ki party kiba la synshar lang ha ka sorkar, ka sorkar ka kloi ban pynlait ïa ka bhah mang pisa ba dei na ki marpoh khyndew sha ki,” pynpaw u Bah Roy Kupar Synrem.

Leave A Reply

Your email address will not be published.