Ha kane ka por kaba mynta donkam ban tyngkai bad pynneh pynsah bha ïa ka bording: Metbah

Shillong, Risaw 06: U Myntri ka tnat Bording ka jylla u Bah Metbah Lyngdoh, u la plie ïa ka Bureau of Energy Efficiency (BEE) – Indo-German Energy Programme Partnership Summit for State Designated Agencies (SDAs) ha nongbah Shillong ha ka sngi Nyngkong.
Kane ka jingïalang ne ka summit kadei ka prokram da ka jingïatreilang hapdeng ka Ministry of Power bad ka German Agency for International Cooperation (GIZ) ban bishar ïa ki kam kiba ïadei bad ki kam bording bad ki jingdonkam ban pynneh ïa ka kam bording ha kane ka thaiñ shatei lammihngi.
Ki la don kumba 11 tylli ki State Designated Agency, ki nongthaw aiñ, ki ophisar na ka Bureau of Energy Efficiency, bad ki nongmihkhmat jong ka GIZ kiba la shim bynta ha kane ka jingïalang.
Haba kren ha kane ka prokram plie, u Bah Metbah u la ong ba kane ka jingïalang ka la long ha ka por kaba kongsan bha ha kaba ka jingtyngkai ïa ka bording bad ka jingpyndonkam ïa ka bording ka la kylla long ym tang na ka bynta ki jingthmu ha ka roi ka san hynrei ka jingdonkam ruh ha ka ri baroh kawei.
U la ban jur ba katba ka jingdawa ïa ka bording ka la ïaibteng ha kylleng ka ri, ka jingban jur halor ki tyllong, ki lad jingtei bad ka sawdong sawkun ka la kiew sted bha. Kane ka pynkynmaw ïa ka jingdonkam ban tyngkai ïa ka bording khnang ban lah ban ring ïa ka bording, bad kaei kaba la tyngkai mynta kan pynwandur ïa ka lawei jong ki pateng ban wan.
U Myntri u la pyntip ba ka sorkar jylla, lyngba ka State Designated Agency hapoh ka tnat Bording, ka la shim bun ki sienjam ban kyntiew ïa ka kam bording ha kylleng ka jylla. Kine ki sienjam ki dei ban thaw ki lad jingpynsngewthuh bad ka jingpynshlur ïa ki paidbah ban pyndonkam da ki LED light bad ki star-rated appliance, da kaba ïadon bynta lang bad ki skul ki college ban ai ki jingpynsngewthuh bad ka jingpyndonkam bha ïa ka bording, nangta ka jingpynlong ïa ki prokram ba tei ban tyngkai ïa ka bording bad kiwei.
U Bah Metbah u la banjur ba kane ka dang dei tang ka jingsdang, bad dang donkam bun kiei kiei kiba dei ban leh. U la ong ba ka jylla ka la rai ban pynkhlaiñ ïa ki jingpyrshang ban ïatreilang lang bad ka sorkar pdeng bad kiwei pat ki jylla.
U Myntri u la batai ruh ba kane ka jingïakynduhlang hapdeng ki thaiñ ka long ka nuksa kaba khlaiñ bor ban don ka jingïatreilang. Wat hapdeng ki jingïapher ha ka jingheh jingrit, ka jinglong ki jaka bad ka khyndew ka shyiap, bad ki jingdonkam ïa ka bording, ki jylla ki ïatylli halor ki jingangnud jong ki ban tyngkai ïa ka bording.
U la banjur halor ka jinglong kongsan ka jingsam ïa ki jingïohmad ne ki jingmlien, ki jingshem thymmai, bad ki jingïaleh hapdeng ki jylla ban tip iwei na iwei pat bad ban thaw ka bor ba khlaiñ, ka jingïalong kawei ban tyngkai ïa ka bording bad ban pynbha pat ïa ki lad treikam.
U Bah Metbah u la pynpaw ka jingkhublei ïa ka jingkyrshan bad ka jinglam lynti jong ka Bureau of Energy Efficiency (BEE) sha ka state designated agency, kaba la trei ïa ka kam kaba kongsan ha ka ri bad ban pynkupbor ïa ki State Designated Agency.
Halor ka jingdonkam ban tyngkai ïa ka bording, u la banjur ba kam dei tang shaphang ki kam technology ne ki jingtei hynrei kumjuh ruh shaphang ka jingkylla ka jinglong ne ki jingleh ïa ki kam. Ki kam kiba suk kum ka jingpynlip ïa ka bording bad ki appliance haba ym pat donkam, da kaba pyndonkam ïa ki tiar kiba bha ban pyndonkam, ban jied ïa ka kam ka kit ka bah ne ki kali bording, bad da kaba pyndonkam ruh ïa ka bording na ka sngi kaba lah ban wanrah ka jingïapher kaba heh lada shim bad leh da ki million ki paidbah.
U la kyntu ïa manla iwei pa iwei ban pynthikna ba manla ki unit jong ka jingtan ïa ka bording bad kaba pynpoi ne sam sha ki paidbah dei ban pyndonkam da ka jingstad kum ki nongshong shnong kiba don ki jingkitkhlieh.
U Bah Metbah u la pynthikna ha ka jingïalang ba ka Meghalaya kan bteng ban treikam ïa ka kam kaba kongsan halor ka national mission ban tyngkai ïa ka bording, ban ïatreilang ban thaw ki lad jingpynjyrngam, bad kiwei kiwei kiba lah ban pynlong ïa ka ri India kaba neh.