Shillong, Nailur 25 : U Myntri Rangbah ka jylla u Conrad K Sangma ha kane ka sngi Balang u la plie ïa ka workshop ba la pynlong da ka Directorate of Mineral Resources, ka sorkar Meghalaya halor ka phang“Enhancing Mineral Exploration lyngba ka NMET”.
Ha ka jingkren, u Myntri Rangbah u la ong ba ïa kane ka jingïalang la pynlong da ka jingthmu ban noh synñiang sha ka thong jong ka Ri ban pynlong ïa ka ri India ka Viksit Bharat.
Shuh shuh u ong ruh ba ha kane ka juk stad teknoloji mynta ka jingwad marpoh khyndew ka la long kaba kham thikna, kaba suk bad katkum ka juk stad. U ong ba jingdon ki stad ha ka teknoloji kum ka NESAC ki la don ka bynta kaba kongsan bha ym tang ha ki kam tih marpoh khyndew wat ha kiwei pat ki bynta kum ha ki jingbuddien ïa ka jingdon ki tyllong um bad ki khlaw ki btap.
U Myntri Rangbah u ong ruh ba watla ka jingwad ïa ki marpoh khyndew kumjuh ka jingkhlong ïa ki kadei na bynta ka roi ka pa bad ka jingdonkam jong ka jylla bad ka ri hynrei ka long ruh kaba donkam pat ban peit ba kan ym ktah palat ïa ka mariang bad ki sawdong sawkun jong ka.
“Kum kiba don bynta lang, ngim lah ban shu khapbrib ïa kine ki bynta ba kongsan tam kiban pyntikna ba kan ym don ka jingnoh shilliang,” u la ong.
Nalorkane, u Myntri Rangbah u la kdew ruh ba ka rukom bat khyndew ha ka jylla ka long kaba kyrpang bha bad kaba la rung ha ka kolshor bad ka riti dustur. “Kine ki bynta ruh ki dei kiei kiei kiba ngim kwah ban ïaid lait bad ka long ruh kaba kongsan ban burom ïa kine ki kolshor, ki riti dustur. Donkam ban ïatreilang bad ki ban tei ïa ka jingïasngewthuh jingmut bad leh ïa kano kano da ka jingïa mynjur lang,” u la pynpaw.
Haba pynkut ïa ka jingkren, u Myntri Rangbah u la ong ba ka jingkylla ïa ka rukom tih marpoh khyndew na ka rukom tih tynrai kaba ki nongtih jong ka jylla ki la trei da ki spah snem sha ka rukom tih mawshun da ka juk stad ka hap ban don ka nongrim.
“Ka jingkhang ïa ka rukom tih ka bym dei da ka juk stad ka ktah jur ïa ka ïoh ka kot jong ki longiing kiba shaniah ha ka jingtih marpoh khyndew tynrai bad ïa ka ïoh ka kot jong ka jylla. Kumta ka jingkylla ka hap ban long kaba beit salonsar na ka bynta baroh ha kaba ka jingkylla ka jïa hapoh ka por ba la buh,” u la ong.
Ha kane ka prokram, u Myntri Rangbah u la pyllait paidbah ruh ïa ka State Geological and Mineral Map of Meghalaya ha ka jingheh kaba 1:1 million scale bad u la pyllait paidbah ruh ïa ka Meghalaya Minerals Database.
Kumba ka long mynta ka Directorate of Mineral Resources bad ka Geological Survey of India ki dei tang ki artylli ki tnad sorkar kiba don ha ka bynta ban wad bniah ïa ki marpoh khyndew ha kane ka jylla bad ka la duna ka jingïashim bynta na ki kynhun riew shimet ha ki kam wad marpoh khyndew.
Ha kane ka sngi la ïoh ruh ïa ka jingkren na u Asit Saha, Director General ka GSI, nangta na u RP Marak, Director Mineral Resources, Shillong, VK Mantri, Commissioner & Secretary Mining & Geology Department, Dr. Gopal Sharma, Scientist SE Geoscience Division, NESAC bad ruh na u David D Sangma, Additional Secretary, Mining & Geology Department nalor kiwei kiwei.
