Ha kajuh ka kamra sumar lang ïa u koidi bad ki nongpang ha Civil Hospital, Nongpoh

Nongpoh, Lber 08: Ki nongïalam ka Federation of Khasi Jaintia and Garo People (FKJGP) North Khasi Hills District mynta ka sngi kila leit ban ïakynduh syndon ïaka Medical Superintendent jong ka Civil Hospital Nongpoh hadien ba seng kala lap ba ki bor pynïaid jong katei ka hospital ki khlem don kano kano ka jaka pynthiah kyrpang naka bynta ki koidi hynrei la pynthiah lang hajuh bad ki riew paidbah kiba leit phah sumar ha katei ka hospital sorkar.
Haba kren sha ki lad pathai khubor naka liang u Bah Ricky Majaw Publicity Secretary haka jingdonlang u Samla Banroy Wahlang Asst Publicity secretary ka North Khasi Hills District ryngkat ki dkhot u la ong ba kum ka seng ka dap da ka jingsngewkhia halor ka jingpynthiah lang ïaki koidi kiba dang don hapdeng ka jingshah sumar bad ki riew paidbah kiba leit sumar ha katei ka hospital ka ba la wanrah pynban ka jingsyier ïaki paidbah.
U la ong ruh kat ka kyrdan Civil Hospital kala dei ban don ka jaka pynthiah kyrpang naka bynta ki koidi ba shah sumar ym ban pynthiah lang bad ki paidbah, ha kaba naka liang ka Dr D Blah Medical Superintendent kala pynshai sha ki nongïalam ka seng ba kadei ka jingkhapngiah jong ka jaka ha kaba naka liang jong ka kan sa shimkhia halor katei ka kam namar kumba long mynta la shu kyntiew kyrdan tang ka kyrteng katba ka building treikam ka dang long kumjuh.