Shillong, Naiwieng 09: U Vice-Chancellor jong ka North-Eastern Hill University (NEHU) u Prof Prabha Shankar Shukla ha ka wat kaba ar ha ka sngi Saitjaiñ u la kyrpad ïa ki samla pule ba kin sangeh noh ka jingïakhih shah thngan bad ba kin wan sha ka miej jingïakren.
Hynrei shwa ba u Vice Chancellor un pynmih ïa kane ka jingkyrpad, ki nongïalam jong ka NEHUSTU ha ka sngi Saitjain ki la kyntait ïa kane ka jingkhot ïakren jong u Vice Chancellor bad ong ba kin sa leit sha ka miej jingïakren tang lada u Vice Chancellor u la hiar na ka shuki kum u khlieh jong kane ka shlem pule.
La sakhi ba kane ka skulbah ha kine ki sngi ka la mad ïa ka jingkhang khyrdep hadien ba ka la don ka jingïakhih shah thngan ba la ïalam da ka North Eastern Hill University Students’ Union (NEHUSU) bad kaba la kyrshan da ka Khasi Students Union (KSU) NEHU Unit kaba la dawa ïa u Vice Chancellor ban hiar shuki bad ban weng kam noh ïa u Registrar u Omkar Singh bad Deputy Registrar (Academics) u Amit Gupta namar ka jingthungkam katkum ka jingong jong ki ka long kaba shu “thung be-aiñ.”
Ki samla pule kiba la kem pang ki la nangbun hadien ba ka jingshah thngan ka la kynjoh la palat 100 kynta.
Ha ka jingkyrpad, u Prof Shukla u la ïaiban ïa ka mon jong u ban khmih ïa baroh ki jingsngewkhia ba la pynpaw da ki samla pule da kaba ong ba u long uba kloi ban peit ïa ka bha ka miat jong ki samla pule ka NEHU bad ka jingkiew jong kane ka shlem pule.
Haba pynpaw ïa ka jingsngewkhia halor ka koit ka khiah bad ka bha ka miat ki samla pule, u Prof Shukla u la pynpaw ïa ki jingpyrshang jong u ha ki por ba mynshwa ban kynduh ïa ki samla pule bad kumjuh ruh ban ïakren bad ki bad banjur ba um don satia ka jingisih ïa ki hynrei u kwah na ka bynta ka jingjop bad ka roi ka san jong ki samla pule.
“Nga don hangne ban pynbeit ïa baroh ki mat bad ban pynbeit ruh ïa baroh ki jingdawa ba la buh hakhmat da ki samla pule haba shit ba shai,” u la ong.
Wat hapdeng ki jingpyrshang jong u ban ïakynduh bad ki samla pule hynrei u la hap ban shong khop hapoh ka jaka sah jong u bad shah pyrkhing ban mih shabar napoh ka Campus.
Kum ka sienjam ban khmih ïa ki jingsngewkhia jong ki samla pule, u Vice-Chancellor u la tyrwa ruh ban khot ïa ka jingïalang kaba kyrkieh jong ka Executive Council (EC), hynrei kane ka la slem noh na ka daw ba bun ki jingshah pyrkhing.
U la kyrpad ïa ki samla pule ba kin ailad ban pynlong ïa ka jingïalang Executive Council kaba la thmu ban pynlong ha ka 11 tarik mynta u bnai khnang ba un dup lah ban leh noh mardor halor ki jingdawa ba kynthup ïa ka jingthung ïa ki Pro-Vice-Chancellor ha Shillong bad ha Tura Campus bad ka jingthaw ïa ka Enquiry committee ban bishar halor ka jingthungkam ïa u Registrar bad ïa u Deputy Registrar.
