Ha ka trial um shym la lah ïalehkai bha, kumno un shah jied ha ka thup jong ka jylla: SWKHDCA

Mawkyrwat, Naitung 27: Ka South West Khasi Hills District Cricket Association (SWKHDCA) ka pynpaw ïa ka jingsngewkhia kaba jur halor ka jingkynnoh bym don nongrim jong uwei u ‘rangialehkai kriket jong ka South West Khasi Hills District pyrshah ïa ka Meghalaya Cricket Association (MCA) ha ki lad pathai ha kine ki khyndiat sngi ba la dep ba ka don ka jingleh politik da ka Meghalaya Cricket Association ha kaba ïadei bad ka kam jied ‘rangïalehkai ban mih khmat ïa ka jylla.
Ym tang kata, la ong ruh ba u bah Divension Lyngdoh ula kynnoh ba ka don ka jingbamsap kaba jur hapoh ka Meghalaya Cricket Association da kaba pynrung ‘rangïalehkai da ki bar jylla bad shim pisa haduh 5 ne 6 lak tyngka katba ka don pat ka jingleh shiliang khmat ïa ki ‘rangïalehkai kiba dei ki trai jylla.
Namarkata, ha kaba ïa dei bad kane, na ka liang ka South West Khasi Hills District Cricket Association (SWKHDCA) ha ka sngi saitjaiñ jong ka taïew ka 26 tarik u ‘Naitung, 2025 ka la shong ïa ka jingïalang ba kyrkieh hapoh Mawkyrwat bad ïoh ban pynshai ruh ha kaba ïadei bad katei ka kam.
Haba kren ha ki lad pathai khubor, u bah Banteibor Lyngdoh, President bad bah Bakhain Nongsiej, Secretary jong ka South West Khasi Hills District Cricket Association (SWKHDCA) ki la ïathuh ba ïa u Divension Lyngdoh bad lai ngut kiwei pat, ka Association ka la phah ban mihkhmat sha ka trial ba la pynlong da ka Meghalaya Cricket Association ha Jagi Road Assam naduh ka 08 haduh ka 10 tarik u Jylliew, 2025 bad katkum ka jingpeit bñiah lyngba katei ka trial une u ‘rangïalehkai um shym la lah ban ïalehkai bha bad kumta u khlem la shah jied ha ka thup jong ki ‘rangïalehkai hapoh ka jylla Meghalaya.
Shuh shuh halor katei ka jingkren jong u Divension Lyngdoh ha ki lad pathai khubor, na ka liang ka South West Khasi Hills District Cricket Association (SWKHDCA) ka la pynpaw ba kam don kano kano ka jingtip hynrei ka dei ka jingleh shimet jong u bad lehse ka dei na ka daw ba um shym shah jied, ong ki nongïalam ka Association.
Ka South West Khasi Hills District Cricket Association (SWKHDCA) ha kajuh ka por ka panmap ruh na ka Meghalaya Cricket Association ba ka kum phah ïa utei ‘rangïalehkai sha ka trail kaba wanrah pynban ïa ka jinglehraiñ ïa ka Association, ïa ka South West Khasi Hills District baroh kiwei bad kaba la ktah mat-ïong ruh ïa ka Meghalaya Cricket Association.
Kumta, ka South West Khasi Hills District Cricket Association (SWKHDCA) ka la rai ruh ba kam don kano kano ka jingkitkhieh ïa utei u ‘rangïalehkai lada ka MCA ka shim da kano kano ka lynti ha kaba ïa dei bad katei ka jingleh jong u.