Shillong, ïaïong 06: Ka Manchester City kan ïakhun pyrshah ïa ka Southampton ha ka Semifinal ba nyngkong jong ka FA Cup 2026, katba ka Chelsea kan aireng pyrshah ïa ka Leeds United ha ka 25 bad 26 tarik jong u bnai ïaïong.
Baroh ar tylli ki jingïakhun Semi final yn pynïalehkai ha Wembley Stadium ha London.
Ka Manchester City, kaba la poi sha ka phainal ha u snem ba ladep, ka la pynliem noh ïa ka Liverpool da 4-0 ha ka jingïakhun Quarter final, katba ka Chelsea ka la jop suk ïa ka kynhun ïalehkai jong ka League One ka Port Vale da 7-0 ban pynthikna ïa la ka jong ka jaka.
Ka Southampton, kaba jop tang kawei ka khusnam lahduh ha ka FA Cup ha u snem 1976, ka la pynkyndit ïa ka Arsenal, kaba lamkhmat ïa ka Premier League, da kaba jop 2-1 kol ban pynthikna ïa ka jingïakhun pyrshah ïa ka City, kaba la jop hynriew sien.
Nangta ka Leeds United ka la pynliem ïa ka West Ham United lyngba ka penalty shootout da 4-2 ban ïohrung sha ka semifinal kaba nyngkong hadien 39 snem.
