Nongstoiñ, Jylliew 02: Ka Hynñiewtrep Youths Council HYC Maweit, West Khasi Hills District, ka la ïoh ban pyntian smai ne pynthymmai ïa ki nongkitkam kiba thymmai na ka bynta ka samoi 2025-2028.
Na ka liang u Bah Lumlang Kharsyiemlieh President HYC West Khasi Hills u la pyntian smai ïa ki dkhot bad u la pynkynmaw ïa ki nongrim ka seng. U la ong ba kum u nongïalam u sngew kmen ban ïoh don bynta naduh mynshuwa haduh mynta ban dawa ka sorkar ban pynbit pynbiang ïa ki jingdonkam ka thaiñ.
U la pynkynmaw ïa ka jingïaid kjat ka seng HYC Maweit ha ka 29 tarik Ïaiong 2019 naduh na Maweit sha Nongstoiñ kumba 8 kynta, ban dawa ïaka surok na Nongstoiñ Maweit shaduh Kulang bad kiwei kiwei ki jingdonkam.
U la ong ba ki nongkitkam ba thymmai kin buddien ïa ki kam ba ka EC barim ka la leh, ba ka Sorkar ka dei ban pynbiang ïa ka PHC Maweit, ki surok ba bun kim pat biang na surok bah sha ki Shnong. U la pynpaw ruh ka jingsngewkhia ba ha ka thaiñ Maweit, dang bun bah ki Shnong kim pat ïoh bording (light) wat hapdeng kane ka spah snem kaba 21.
U Samla Shemphang Tyrsa President ba thymmai u la ong ba ka seng kan trei shitom ban wanrah ïa ka dur ka jingkylla ha ka thaiñ, ban ïatreilang bad ki para samla, para sengbhalang, ki nongsynshar shnong bad u MLA ban wanrah ïa ka jingkylla ha ka thaiñ.
La ïoh ïa ka jingkren ai mynsiem na ki dkhot kiba dei ki nongseng ka HYC Maweit Circle kiba la shongthait, kum Bah Bendrowel Hashah u ba la kyntu ba ki dkhot kin long kiba trei hok bad ban ym kynran dien hynrei ban shanïah ba u Blei un ïalam.
Ha katei ka jingïalang la pynïaid da u Samla Olivertwist Marngar Office Secretary ka HYC West Khasi Hills District. La ïoh ban duwai shuwa ban sdang da u samla Pynrap L Rngaid Assistant Organising Secretary HYC WKHD.
Ki nongkitkam ba thymmai jong ka HYC Maweit circle ki long President Shemphang Tyrsa, Vice President Pynshai Shyrkon bad Stable Langrin, General Secretary Maxmilando Umiong, Assistant secretary Lambor Paliar, Organising Secretary Kyrshanbor Marngar lem bad kiwei kiwei de ki nongkitkam ha ryngkat ki dkhot jong ka EC thymmai.
