Ha ka sngi sdang trei, pdiang sngewbha ka Secretariat ïa u snem ba thymmai da ba kynjah slam slam

Shillong, Kyllalyngkot 03: Ka Meghalaya Secretariat kaba dei ka shlem trei kam jong ka sorkar, kala pdiang sngewbha ïa u snem ba thymmai haba jan baroh ki karma ki thylli lut ha ka sngi Thohdieng kata ha ka 2 tarik kaba dei ka sngi sdang trei hadien ka shuthi Christmas bad snem Thymmai.
Na ka liang u Myntri Rangbah ka jylla u Conrad K Sangma ha ryngkat bad ki ar ngut ki symbud myntri rangbah kata u Bah Prestone Tynsong bad u Bah Sniawbhalang Dhar ruh ki khlem poi trei satia ha ka sngi Thohdieng.
Ym tang katta wat ki myntri sorkar ruh ki khlem poi trei lait noh tang katto katne ngut eh ki heh ophisar kiba poi trei ha ka sngi ba sdang, hadien ka shuti.
Ka sorkar jylla kala dep ban pynbna ba kan sdang trei noh ha ka 2 tarik u K’Lyngkot 2026 kata ha ka sngi Thohdieng, hadien ba la ai shuti noh naduh ka 19 tarik u Nohprah 2025, ha kaba ïadei bad ka jingrakhe Christmas bad New Year.
Ki tyllong khubor ki ong ba ka sorkar kala dei ban pynbna ïa ka 2 tarik u kyllalyngkot ruh kum ka sngi shuti bad yn sa pyndap ne (compensate) noh hadien ban ïa kaba pynlong trei ha ka sngi ba kut taïew.
Ka sngi long trei kadei tang ha ka 2 tarik kaba dei ruh ka sngi Thohdieng bad ka 3 tarik ka sngi saitjain bad 4 tarik kadei ka sngi u Blei kadei ka sngi shuti, hynrei ha ka sngi kaba bud pat kata ha ka 5 tarik u Kyllalyngkot kan dei ka sngi long trei.