Nongpoh, Rymphang 03: Ka Meghalaya Motorsports Society kum ka jingai rynsan ïa ki khun samla ka jylla, ka la pynlong ha ka sienjam kaba nyngkong ïa ka FMSCI Time Attack National Motorsports ha Umroi, kaba la long ha ka 31 tarik u Kyllalyngkot 2025 bad la pynkut ha ka 1 tarik u Rymphang 2025 ha Umden Umsaitprah ba hap ha ka thaiñ Umroi ha Ri Bhoi District.
Kane ka jingïakop ñiah kali ha ki jaka ktieh jong ka jylal, la wan ban shim bynta haduh 117 ngut ha ki kyrdan bapher bapher bad kynthup ruh ki samla ba shim bynta na ka jylla kiba la ioh ïa ka lad ban sei madan ha ka sien kaba nyngkong ïa ka jingïakop ñiah Kali bad ka long ruh ka rynsan ba kyrpang ïa kito ki samla kiba ieit ïa ka jingïakop pynher kali (Motorsports) na ka jylla.
La wan ban plie paidbah ïa kane ka Motorsport da ka Deputy Commissioner ka East Khasi Hills District, ka Kong Rosetta M. Kurbah kum ka kongsan bad la wan ruh ban pynhap pyrda da u Deputy Commissioner ka Ri Bhoi, u Abhilash Baranwal kum u kongsan bad kiwei kiwei kiwei kiba la sakhi ïa kane ka jingïakop pynher Kali da ka jingdon lang Lieutenant General V. Lakhera, na ka Assam Rifles Laitkor, u Lieutenant Col. J K Nautiyal, Retd. ADM Commandant ka Umroi Military Station bad u President ka Meghalaya Motorsports society, ka Easter Giselle Kharkongor bad kynthup ruh ka Chairperson, ka kong Phoebe Dale Nongrum, kaba dei ka riewkynthei ba nyngkong ba shim bynta ha ka F1 na ka thaiñ shatei Lam Mihngi ka ri India bad ka riew kynthei kaba la shim bynta ha ka Rally Driver bad ka Vice-Champion ha ka INRC Women’s Category 2024.
Haba kren sha ki lad pathai khubor, ka Phoebe Dale Nongrum, Chairperson ka Meghalaya Motorsports Society, ka la pynpaw ba ka thong kaba hakhmat eh ban pynlong ïa kane ka Motorsports ka long ban ai rynsan ïa ki khun samla ka jylla ba kin ioh ka lad ban sei madan ïa ki sap ñiah Kali ha ka National Level bad ruh ioh lad ban sei kyrpang ïa ki sap lyngba ka jingdon kum kane ka rynsan ïa kop ñiah Kali.
Shuh shuh, u Sanam Sekhon, uwei na u Nongñiah Kali Motorsport na Chandigarh bad uba la tip ruh kum u ‘Drift King of India’ u la kren sha ki lad pathai khubor, da kaba ban khiah halor ka jinglong kyrpang ki dribar kiba shim bynta ha kum kine ki rynsan bad ym ha ha ki jaka paidbah.
