Rambrai, Ïaiong, 15: Ka Mawdet Secondary School Rambrai, mynta ka sngi ka la pynkup burom ïa ki khynnah skul kiba la wan shakhmat ha ki jingpule ha ka exam matrik SSLC 2025 kaba dang shu dep shen.
Ka jingpass bha ki khynnah watla ka dei ka skul kaba sha kyndong, ka la long shisha ka jingsngew sarong ym tang ia ki kmie ki kpa, hynrei ka jingkmen ruh ïa ka skul hi baroh kawei, namar nalor ba ki la pass ki la ïoh ruh 1st Division, khamtam ba ka dei ka sien kaba nyngkong eh ba ka skul Mawdet Secondary School, kan phah thoh exam matrik ïa ki khynnah wat haba dang sdang ïa katei ka Secondary ha u snem 2023.
La seng ïa katei ka skul ha u snem 2004 bad ha u snem 2023 la ïoh ban kyntiew kyrdan sha ka secondary school. Hynrei da ka jingtrei shitom bad aiti khamtam na ki nonghikai, la lah pat mynta ban kynjoh sha kane ka thong bad nam ka burom.
Ïa kane ka jingpynkup burom la pynlong ha phyllaw ka skul Mawdet, ha kaba u bah E.Lyngdoh Block Development Officer ka Nongstoiñ C&RD Block Rambrai C&RD Block bad ka Ri Mulliang, u la long kum u kongsan ryngkat ka jingïadonlang u bah Mickey Syiemlieh u ba wan na ka ophis jong ka SDSEO Nongstoiñ, u babu B.I.Nongsiej u nongseng ïa katei ka skul uba la seng ruh da ki phew tylli ki skul ha katei ka thaiñ, u babu Banteilang Rimiat Assistant Headmaster ka Mawdet secondary school, ki nonghikai, ki nongïalam ka Shnong Mawdet bad kiwei.
