Nongpoh, Nohprah 11: Da ki hajar ngut ki samla ka Balang Katholik ba hap ha ka Zone-VI ha ka lama ka Shillong Archdiocese Catholic Youth Movement mynta ki la pynlong ïa ka jingïakynduh lang ha Byrnihat Parish na ka bynta ban ïa kren bad ban ïa phylliew jingmut kum ki para samla na ka bynta ban pynkhaiñ ïa ka Balang bad na ka bynta ka bha ka miat jong ki khun samla.
Kane ka jingïakynduh lang ka la sdang naduh ka 9 tarik u Nohprah 2023 bad la pynkut noh mynta ka sngi u Blei da ka Mass bakhuid ba la shim bynta da ki khun samla bad ki paid riewngeit ka Balang Katholik na ka Zone-VI ba hap ha ka Shillong Archdiocese.
Ka phang jong kane ka jingïakynduh lang (Convention) ka long, ‘Ym slem hadien ka Maria ka la khreh la khrum bad ka la leit bak sha ri lum sha ka shnong Judia’. U Fr. Peter Syiemlieh, Spiritual Director ka SACYM ka Zone-VI mynta ka sngi u la wan shim bynta ban pyndep ïa ka niam ka rukom ha ka mass bakhuid bad ryngkat ka jingsam ïa ka ktien ka jong U Blei sha ki hajar ngut ki samla bad ki paid riewngeit ka Balang Katholik kiba la wan ban shim bynta sha kane ka lympungbah ki khun samla.
Ha kane ka sngi, nalor ka mass bakhuid la pynkut da ka jingmane sacrament ha noh phai sngi bad bud sa ki cultural program bapher bapher ba la shim bynta da ki khun samla bad la ai mynsiem ruh ha kane ka sngi da ka jingdon lang u MLA ka Jirang, u bah Sosthenes Sohtun ha ka Mass bakhuid bad u MLA ka Nongpoh u Bah Mayral Born Syiem ha ka jingïaseng noh phai Sngi nalor ki nongïalam niam naduh ki phadar, ki sister, ki rangbah balang bad ki paid riewngeit ka Balang Katholik. Haba phashat ïa ka ktien ka jong u Blei ha ka Mass Bakhuid, u Fr. Peter Syiemlieh u la kren halor ka jinglong jingman kane ka juk ba mynta kiba la ïabeh tang ïa ka spah bad ka rongpong pyrthei bad bun ki la klet ïa ka jingim ba kynja mynsiem ha kaba kane ka pyrthei ka dei tang ka ïing shong basa bad ka ïing shongneh ka dei ha Bneng.
U laong ruh ngi la im ha kane ka ïa jong ki sngi ba khatduh bad kum ki samla kim dei ban ngop ha ki kam sngewha jong ka pyrthei bad ka pyrthei ka lah ban ai shipor ka jingsngewbha bad ha kaba khatduh ka dei tang ka jingbabe suda. U la kyntu ruh kum ki khun samla ka Balang ki dei ban im sngi ban tei ïa ka Balang bad ka imlang ka sahlang da kaba ai nuksa ruh ïa u Ioanis Nongpynbaptis uba pynrit ïa lade hakhmat u Blei bad uba phai sha u Blei bad uba ngeit skhem ïa ka jingshisha bad ruh uba aiti ïa lade na ka bynta ka kam ka jong u Blei.
