Shillong, Risaw 25 : Ka Dorbar Raid Mylliem, Hima Mylliem ha ka sien kaba nyngkong ka la ïoh ïa ka ïing Dorbar kaba paka ban pynlong Dorbar ha ïew Mylliem Rim. Kane ka jaka pynlong Dorbar ka dei kaba don shibun ki khana tang bad haduh mynta mynne u Syiem ka Hima Mylliem u ba la shah thung pura u hap ban leit pynithuh ïalade sha ki khun ki hajar ka dorbar ha ïew Mylliem.
Ïa kane ka ïingdorbar la plie paidbah ha ka sngi Ba-ar da u MLA ka thaiñ uba dei ruh u Myntri ha ka Sorkar, u Bah Hamletson Dohling ha ka jingdon lang u CEM ka KHADC, u Bah Titosstarwell Chyne, u Acting Syiem ka Hima Mylliem, u Pa’iem Ainam Manik Syiem ki Myntri, ki Bakhraw jong ka Hima nalor ki nongïalam shnong.
Na ka liang u Kongsan haba kren ha ka jingïalang u la ong ba kum u Myntri ka tnad Urban Affairs ha ki snem bala dep u ai ka burom kaba khraw ïa ka Hima Mylliem kaba ryngkat ryngkat bad ka Council ki la ïohi ban sdang nyngkong kumno ban ïa kren ban pynkynriah noh ïa ki briew kiba sha ha Them Iewmawlong lyngba ka Consultative Committee kaba khlieh da ma u hi.
U ong ruh ba dei lyngba ka jingïohi jngai jong ka Hima Mylliem ba ki jaka sor bad khap sor ki dang ïohi ïa ki khlaw ba rben bad ki tyllong um haduh mynta mynta. U la ai ruh ka jingïaroh ïa ka Hima kaba la ïai bteng ban pynneh pynsah ïa ka riti dustur bad ka lehniam leh rukom haduh mynta mynne.
Haba bynrap lang, u CEM ka KHADC pat u la ong ba ha kane ka juk mynta la donkam ban buh noh da ki jingthoh khnang ba ki pateng kin tip shaphang ka jingtreikam jong ka Hima Mylliem, nangta ka riti dustur bad ka lehniam leh rukom khnang ba ka pateng ban sa wan kan tip.
“Lada lah ban buh da ki jingthoh ki pateng ban sa wan ruh kin sa ïoh ban tip namar ha ki skul lei mynta wat ïa ka sobjek Khasi ruh kim pyndonkam shuh. Kumta lada ym buh noh da ki jingthoh ka pateng ban sa wan kin ym tip shuh wat shaphang ka jingjied Syiem lane thung Syiem,” u la ong.
Ha kane ka sngi na ka liang u Acting Syiem ka Hima Mylliem, Paiem Ainam Manik Syiem, nangta na u Secretary ka Raid Mylliem u Myntri MB Kharlukhi u la batai lyngkot ïa ka khana jong ka rukom pynlong Dorbar bad ki khana pateng jong katei ka jaka ba la ju pynlong ïa ka dorbar ba shisien shi snem.
