Mawkyrwat, Jymmang 27, 2025: Kum shibynta jong ka jingkynmaw ïa ka World Football Day na ka liang la Football Academy Sawsymper jong ka Ïaitylli Sports Groups bad ka Lawei Sports Club ryngkat ki khynnah ki la ïoh ban rakhe lehkmen ia kane ka sngi kyrpang da kaba buh ïa ka phang kaba long, “Together We Are Strong” bad ïa kane ka rakhe ha Madan Sawsymper, East Khasi Hills District.
U kongsan ha kane ka sngi u dei u bah Rangstarwell Wankhar, Reld., ophisar jong ka Soil & Water Resources ha kaba u la noh synñiang ïa ka Football Academy da ki bol kynjat ryngkat ruh ka song pisa. Ha ka jingkren jong u kum u kongsan u la ong ba kane ka long kaei kaei ka jingpynkmen ïa u ban don bynta lang ha kum kane ka lympung jong ka jingrakhe lehkmen namar da ka jingdon ïa kiba kum kine ki jaka ai jinghikai ïalehkai kan lah ban pyllait ïa ki khynnah na shibun ki jingma kiba ker sawdong kum u drok, ka kyiad bad kiwei de ki jingsniew.
Namarkata, u la ai mynsiem ïa ki khynnah ba kim dei ban shu wan ban shah hikai tang ban pynlut kai ïa ka por jong ki hynrei ki dei ban da shimkhia bad pynleit jingmut khnang ba kin long uei re uei ha ki sngi ban sa wan. Ym tang kata, u la ong ba um kwah ruh ban ïohi ba ki juh ki khynnah kiba la pyndep ïa ki jingshah hikai ha ka Football Academy kin sa leit pynlut pat sa ïa ka por ha ki pata kyiad ne ki kam sniew.
Haba ai jingkren pynshai na ka bynta kane ka sngi kyrpang jong ka World Football Day, u samla Manchwamiki Kso uba dei u nongkitkam jong ka Ïaitylli Sports Groups u la ong ba liang ka UNO ka dang ithuh dang shen ïa kane ka sngi kyrpang jong ka jingïalehkai kynjatbol kata ha u snem 2024 da kaba ki la buh ïa ka 25 tarik u Jymmang kan dei ka sngi kyrpang jong ka jingïalehkai kynjatbol namar kane ka jingïalehkai ka long kaba kongsan tam ha ka pyrthei hi baroh kawei.
Kiwei de kiba la ai jingkren ki long u bah Emarson Malngiang uba dei u nongapkol ba rim ka Langsning bad uba la mihkhmat ruh ïa ka Ri India ha ka Sub Junior Level sha Thailand ha u snem 1987 bud sa ki jingkren na u bah S. Thangkhiew, Senior Demonstrator jong ka Soil & Water Conservation, u bah Drimshon Mawlein na ka Lawei Sports Club, bad na kiwei de ki riew rangbah.
La pynshit pynshngaiñ shuh ïa kane ka sngi kyrpang jong ka kam ïalehkai kynjatbol da ki khynnah kiba la wan shah pynhikai ne pyntbit ïa lade ha ka Football Academy jong ka Ïaitylli Sport Group bad Lawei Sports Club.
