Jowai, Nailar 14: Ka West Jaiñtia Adventure & Cycling Association (WJACA) hynnin ka sngi saitjaiñ kala pynlong ïa ka jingïakop ñiah bicycle sha ki jaka lum ïa kaba la ai kyrteng ka ‘Biking Challenge Chapter 1.0’ ha Umlidoh Mihmyntdu West Jaiñtia Hills, ïa kaba la pynbynta ha ki lai kyrdan kata ka XEO Women, ka XEO Junior Men bad ka XEO Elite Men.
La ïathuh ba ka jingpynlong ïa kane ka Biking Challenge Chapter 1.0 ka dei ka sien kaba nyngkong eh hapoh ka Ri-Lum Jaiñtia, khnang ba ki khun samla kin ïoh ka lad ban pynpaw pyrthei ïala ki sap ki pong ba ki don, hashwa kane la don ka jingïalang ha kaba u MLA ka Jowai Constituency ma Wailadmiki Shylla ula long kum u kongsan.
U ma Wailad haba kren u ai ruh ka jingkitbok kitrwiang ïa kane ka Association ba kan dang bteng ban pynlong ïa kum kine ki prokram naka bynta ki khun samla bad ha ka juh ka por ula kaweh ruh ïa ka lama jong kane ka jingïakop.
Ki nongjop ha ka kyran XEO Women ki long ka Phyrnai Kyndiah bad ba ar ka Destini Dhar, ha ka XEO Junior Men la wan ba nyngkong da u Fiarborn Synnah ba ar u John Rodrick Banteilang Shadap bad ba lai u Hopefulson Thubru. Katba ha ka kyrdan XEO Elite Men la wan ba nyyngkong da u Meshain Kyndiat, ba ar u Emiunipius Rymbai bad ba lai da u Fairly Shadap.
Ïa ki khusnam sha ki nongjop la sam da u kongsan haka por janmiet ma Awhai Andrew Shullai MDC Jowai Central, nalor kane ka jingïakop ‘Biking Challenge Chapter 1.0’ la don ruh ka jingïakop bam pylleng bad ka jingpynkhalai nusib.
