Ha ka sien ba nyngkong la pyntem bad rwai ïa 3 tylli ki anthem ieid ri ha Ïingdorbar thaw aiñ ka jylla

Shillong, Rymphang 16: Ka Dorbar Mang Tyngka jong u snem 2026-2027 ka la sdang ha ka sngi Nyngkong ka ban neh haduh 10 sngi lynter bad ha kane ka sngi la sdang ïa ka dorbar da kaba pyntem ïa ki 3 tylli ki jingrwai ieid ri.
Haba sdang u Lamphang ka Ïing Dorbar Thaw aiñ u Thomas. A. Sangma u la pynbna ha ka Ïing dorbar ba la ïoh ïa ka jingbthah na ka ophis jong u Lamphang ka Dorbar Bah jong ka Ri India ka Lok Sabha ban tem shwa ïa ka jingrwai Vande Mataram, bud sa ka National Anthem bad ka jingrwai State Anthem.
Kane ka dei ka sien ba nyngkong naduh ba ka jylla ka la pdiang ïa ka State Anthem ba la tem bad pynrwai ïa ka hapoh ka Ïing Dorbar Thaw aiñ ka jylla ha kaba la rwai ïa ka jingrwai ha ki lai tylli ki ktien, ka ktien Khasi, ka ktien Garo bad ka ktien phareng.
Haba kren ha ka Ïing Dorbar u Lat ka jylla C.H. Vijayashankar u la ong ba ka dei ka jingangnud ba kumno ban kyntiew ïa ka jylla ha ka ïoh ka kot shwa u snem 2032, ban poi sha ka thong donkam ïa ka jingïatreilang ban pynlong ïa ka jylla Meghalaya kaba bit kaba biang.