Shillong, Naitung 13: Ka Seng Khasi Seng kmie ha ka sien kaba nyngkong eh ha ka history ba kan leit ai ïa u Tabut(Rot) sha ka Seiñ Raij Jowai kum shibynta lang bad ka Seiñ Raij Jowai ha ka Shad Behdeiñkhlam kaba shisien shisnem.
Haba kren bad ki lad pathai khubor u Rangbah Donkupar Dkhar u President ka Seng Khasi u la ïathuh ba kane ka jingleit ai ka Seng Khasi kan long ruh shi bynta ban teh song lang ïa ka jaidbynriew Khasi kaba don ka jingshah wan hiar thma ha ki bor kiba na bar ban tap lep lut ïa ka riti ka dustur, ka niam ka rukom ka jaidbynriew.
U Rangbah Donkupar u la ïathuh ruh ba kane ka sienjam jong ka seng ka long hadien ba ki tymmen ki san jong ka ki la pynlong shuwa da ka pan hukum na u Blei Nongbuh Nongthaw ïoh don kano kano ka jingwit ba ka Seng kan leit ai ïa u Tabut.
“Kat kum ki dak ki shin na ka khnong ka bishar ka duwai ka phirat ngi ïoh ïa ka dak ba kam don jingwit eiei ba ka seng kan leit ai Tabut” ïathuh u Rangbah Donkupar
“Ngi dei na ka juh ka thymmei bad ka juh ka jaidbynriew bad ka juh ka niam hynrei ki ïapher tang ki rukom leh niam bad da kane ka jingleit ai Tabut kan don ka mynsiem jingïatylli hapdeng u Khasi Pnar bad u Khasi Khynriam” bynrap shuh shuh u Rangbah Donkupar
U Rangbah Donkupar u la ong ba kane ka jingleit ai Tabut ka Seng Khasi kam dei satia ba kan leit ktah ne don bynta eiei bad ka leh niam niam hynrei tang ban don bynta ha ka shad ka kmen hadien ka leh niam leh rukom jong ka Seiñ Raij Jowai.
Shuh shuh u la ïathuh ba kane ka jingleit ai Tabut ka Seng Khasi kan bteng man la u snem nangne sha khmat.
