Shillong, Rymphang 21: Ki pulit jong ka East Jaintia Hills ki la pynjur shuh shuh ïa ka jingpyrkhing ïa ki kam tih bad shalan dewiong beain, ha kaba tang shimiet ki la ïoh kurup haduh 12 tylli ki trok kiba la kit dewiong.
“Ha ka miet ba hapdeng jong ka 20 bad 21 tarik u Rymphang, 12 tylli ki trok kiba la kit dewiong la ïoh kurup da ki pulit ka district”, la ong u Superintendent of Police ka East Jaintia Hills u Pankaj Kumar Rasgania.
U la ong ba kane ka jingpyrkhing kaba dang ïaid haduh mynta ka la lam ïa ka jingkem ïa 22 ngut ki briew, bad la register haduh 94 tylli ki ejahar (FIR), bad ka jingïoh kurup ïa 17,322 metric ton u dewiong bad 25.5 kg ki tiar pynbthei.
Ka jingpyrkhing ïa ka jingtih dewïong beaiñ ka dang ïai bteng hadien ka jingbthei jong ka par dewiong ha Mynsngat-Thangsko, kaba la shim ïa palat 33 ngut ki mynsiem briew.
