Ha ka shi snem 18 klur tam, lap ka HITO lyngba ka RTI ba pynlut ka PWD ban maramot surok

Mawkyrwat, Lber 27: Ka Hynñiewtrep Integrated Territorial Organization (HITO) South West Khasi Hills District lyngba ka jingwad jingtip/ehjahar (RTI) ka la lap ba naduh u bnai Lber, 2023 haduh u bnai Lber, 2024, ka tnad Public Works Department (PWD) (Roads) ka la pynlut haduh ? 18,44,68,772 klur tang na ka bynta ki jingmaramot ïa ki surok hapoh Mawkyrwat, South West Khasi Hills District.
Ym tang kata, u President ka HITO jong ka South West Khasi Hills District, u bah Paul Thyrniang haba pynsngew lyngba ka jingkren ha ki lad pathai khubor u la ong ba tei ka ? 18 klur ka dei ka jingpynlut katkum ka jingpan jong ka seng lyngba ka jingwad jingtip ne ka Right to Information (RTI) ha ka 5 tarik u ‘Nailur, 2024. Kumta la lap ba ha ka 29/05/2023 haduh ka 19/07/2023 jinglut baroh ka long ? 5,73,63,350/- kaba dei ha ka Phase – I.
Nangta, na ka 06/07/2023 haduh 12/04/2024 jinglut baroh ka long ? 12,71,05422 kaba dei ha ka Phase – II bad haba kheiñ kyllum ïa ka jinglut ha ka Phase – I bad Phase – II ka long baroh ? 18,44,68,772 klur.
Namarkata, na ka liang jong ka seng, ka dawa ba ka tnad treikam jong ka PWD (Roads) ba ka dei ban pynshisha halor kane ka jingpynlut bad ka dei ruh ban da kdew shai hangno la pyndonkam ïa kane ka pisa, kumjuh ruh ban pynshisha ïa ki kam ba ki la pyntrei.
Shuh shuh ka Hynñiewtrep Integrated Territorial Organization (HITO), South West Khasi Hills District ka kwah ruh ban pynpaw ba ki paidbah ki don hok ban tip ïa ka jingshisha halor ka jingpynlut pisa paidbah bad ka dawa ruh ba ki bor ba dei peit ki dei ban ai jingkheiñ kaba bniah bad ban pynshai paidbah halor kita ki projek bad ki jingtrei ba la dep.