Mawkyrwat, Lber 22: Kum shibynta ban ïasnohktilang bad ka pyrthei baroh kawei ha ka jingrakhe ïa sngi ba kyrpang jong ka jingpynneh pynsah ïa ka um ne ka ‘World Water Day 2022’, ka ophis jong u Executive Engineer, PHE-cum-Member Secretary DWSM (JJM), South West Khasi Khasi Hills District mynta ka sngi ka 22 tarik u Lber, 2022 ka la ïoh ban pynlong da ka jingïamareh thong ne ka ‘Run for Water’ kaba la sdang naduh ka por 6 baje na phyllaw jong ka ophis treikam u EE, PHE.
Ha kane ka jingïamareh thong, la wan ban ïashimbynta shitrhem naduh ki hep kiba rit, ki samla bad kumjuh ki longkmie longkpa kiba kynthup naduh u bah Tlanding Wahlang, u bah Twanding Mawlong bad ka kong Kmoiñ Wahlang bad da ka jingwan ïa shimbynta jong ki ka la ai mynsiem shikatdei eh na ka bynta ki hep kiba rit bad ki samla kumjuh.
Ha ka jingkren lamphrang shwa ban sdang ka jingïamreh, u bah R. Nongdhar, SDO & Executive Engineer, PHE In-charge, South West Khasi Khasi Hills District u la ïathuh ba ïa kane ka sngi ba kyrpang ban pynneh pynsah ïa ka umbam umdih la sdang nyngkong da ka UNO ha u snem 1993. Ka jingthmu ba kongsan jong kane ka long ban rah khubor sha ki paidbah nongshong shnong ba kumno kin don bad shim ïa kata ka jingkitkhlieh ban pynneh pynsah ïa ka umbam umdih.
U la ai mynsiem ruh na ka bynta ki hep kiba rit, ki samla kiba dei ruh ki khynnah bad ki samla pule ba ki long ka lawei jong ki shnong ki thaw bad ki dei ruh ka nuksa ïa ka pateng ka ban wan ha kaba ïa dei bad kumno ban pynneh pynsah ïa ka um.
U bah S.C. Laloo, Additional Deputy Commissioner, South West Khasi Hills District uba long kum u kongsan ha kane ka sngi u la pynpaw ka jingaikhublei na ka bynta baroh ki nongwan ïa shimbynta ba kynthup naduh ki hep kiba rit, ki samla haduh ki longkmie longkpa bad kane ka long kum ka dak jong ka jingïatreilang jong ki paidbah nongshong shnong ha kaba kum kane ka sngi ban rakhe kynmaw kyrpang ïa ka World Water Day 2022.
U la pynkynmaw ruh ba ngi im ha kine ki sngi kiba eh ba ka jingshit ne ka Global Warming ka la nangkiew na kawei ka sngi sha kawei pat bad ka jingdon jong ka um shapoh ka khyndew ruh ka la nang duna duna. Ki nongjop ha ka jingïamareh thong kane ka sngi ki long u Rockystar Lyngkhoi, u Johnstar Sohphoh bad u Nangkyrshan Kharwanniang kiba dei jong ki shynrang. Ka Lyntij ingkyrmen Kharjahrin, ka Aisha Wanniang bad ka Teilyntishisha jong ki khynthei kine ki dei ki nongjop kiba ha ka karta 16 snem shapoh.
Nangta, u Wolbetstar Ramsiej, u Jomsingstar Ramsiej, bad u Shiningstar Marweiñ jong ki shynrang bad ka Kyntimon Marweiñ, ka Marqueenless Ramsiej bad ka Daplin Wahlang jong ki kynthei kine ki dei ki nongjop ha ka karta ba 16 snem shaneng.
Ha kane ka sngi la ïoh ruh ban sam ïa ki khusnam kyrpang sha ki 40 ngut kiba la wan nongïashimbynta ba kynthup ïa u Edmund Hilary L. Wahlang uba dang 6 snem bad kumjuh ruh ïa ka kong Kmoiñ Wahlang kaba la 73 snem karta.