Ha ka rukom kaba kham pher rakhe sngi pynneh mariang ka tnad Forest, SPVS bad LUMPL

Shillong, Jylliew 10 : Ka Silviculture Division jong ka tnad Forest & Environment Department ka sorkar ryngkat ka jingïatrei lang bad ka Special Purpose Vehicle Society (SPVS) bad kumjuh ka Lafarge Umïam Mining Private Limited (LUMPL) ki la pynlong da ki prokram kiba harukom na ka bynta ban pynphuh ïa ka jingrakhe sngi pynneh mariang ha Nongtrai bad Shella ha ka 08 bad 09 tarik mynta u bnai.
Ha ka sngi ba plie ïa katei ka prokram, ki ophisar na ka tnad Forest kumjuh ruh na ka SPV Society bad LUMPL kiba la pynshai halor ka jingdonkam ban sumar bad pynneh pynsah ïa ka mei mariang kaba long katkum ka phang pdeng jong ka Environment Day, #TangKaweikaPyrthei.
Lyngba ka jingtreilang hapdeng ka tnad Forest, SPVS bad LUMPL ha kitei ki ar shnong jong ka Shella bda Nongtrai ka la sakhi ruh ïa ka jingthungdieng bad ruh ka jingsam ïa ki 2000 tylli ki tynrai dieng ryngkat ka jingshim bynta lang jong ki khynnah skul bad ki nongshong shnong jong kitei ki ar shnong.
Kum shi bynta pat ban pynkhlaiñ shuh shuh ïa ka rep sohñiamtra, la sam haduh 1000 tylli ki tynrai dieng sohniamtra sha baroh ki longiing kiba don ha Nongtrai ba kin lah ban kyntiew biang ïa katei ka rep soh.
Ki tynrai dieng kiba la thung bad sam ha katei ka sngi ha kitei ki arshnong ki la kot sha ka 3000 tynrai. La sam ruh ïa ki khusnam sha baroh ki nongjop na ki skul bapher bapher kiba la shim bynta ha ki prokram pynneh mariang ha kitei ki ar shnong.