Ha ka rukom ba shongkun rakhe ka West Garo Hills ïa ka I-Day ba 79

Shillong, Nailar 16 : U Symbud Myntri Rangbah ka Jylla, Bah Sniawbhalang Dhar u la pynher ïa ka lama lairong jong ka Ri bad shim ruh ïa ka Rashtriya Salute ha ka jingrakhe ïa ka jingdap 79snem ka jinglaitluid ka Ri na ka jingsynshar ki nongwei ha ka jingrakhe kaba long ha kane ka sngi Thohdieng ha Matchakolgre, LP School Playground, New Tura.
Ki kynhun kiba shim bynta ha ka parade ki kynthup naduh ka Tura DEF, 2nd MLP Battalion, Goeragre, NCC kynthei bad kumjuh ki NCC shynrang jong ka Tura Government College, Don Bosco College, Don Bosco Higher Secondary School, Pechon Memorial Higher Secondary School bad St. Mary’s Higher Secondary School.
Nangta na ka kynhun jong ki NCC jong ka Garo Union Higher Secondary School; Scout Troops and Guide Companies na ka Don Bosco Higher Secondary School, St. Xavier’s Higher Secondary School, St. Mary’s Higher Secondary School, Christian Girls’ Higher Secondary School, Government Girls’ Higher Secondary School, bad Garo Union Higher Secondary School; kumjuh na ka Band Party jong ka 2nd MLP Battalion, Goeragre, hapoh ka jingïalam jong u Parade Commander CHM B. Choudhury.
Kane ka jingrakhe ka sakhi ruh ïa ka jingshim bynta shitrhem jong ki kynhun bapher bapher kiba pyni ïa ki kolshor, ki jingshad bad ki jingrwai kiba la pynphuh shuh shuh ïa ka prokram ha kane ka sngi. Ka la don ruh ka jingpyni nam ïa ka jingtbit ki ksew shipai ïa kaba la pyni da ki Border Security Force (BSF), Dobasipara Unit.
Ha kane ka jingrakhe, u Symbud Myntri Rangbah u la sam ruh ïa ka khusnam kyrpang ne ka Appreciation Awards sha ki samla pule ba wan hakhmat eh ha ka eksam MBOSE kiba kynthup naduh ka Esther D. Shira na Sherwood School, Tura; Samridhya Das na Don Bosco College Higher Secondary Section, Tura; bad ka Nev Sharma na Don Bosco College Higher Secondary Section, Tura.
Nangta na kiba pass bha ha ka ICSE bad CBSE kiba shah pynkup burom ki kynthup ïa ka Bakrime Rikande M. Sangma na Nokrek Heights Higher Secondary School, Tura, bad Jeremiah Chemikkim M. Sangma na Tura Public School, Tura.
U Kongsan u la pynkup burom ruh ïa u Bah Flemington Nongrum, UDA, na bynta ki 28 snem ka jingshakri jong u ha ka Indian Army bad na bynta ka kam jong u ha Zila Sainik Welfare Office, West Garo Hills, Tura. Kiwei pat kiba shah pynkup burom ki long u Bensing Ch. Marak, Medical Record Officer; Jehangir D. Shira, Grade IV, District Medical and Health Office; Deboras R. Marak, RCW, bad Amal Kr. Hajong, LDA, District Horticulture Office; Balwan R. Marak, Supervisory Assistant, Establishment Branch, na ophis u Deputy Commissioner; bad Anne Tensie K. Marak, Assistant Teacher, Government Boys Higher Secondary School, Tura, kaba hap ha ka District School Education Officer, West Garo Hills.
Nalor kine, la sam ruh ïa ki khusnam sha kiwei pat, kata sha u Aneesh M. Sangma, khun jong u Gautam Barman bad Assunta M. Sangma, namar ka jinglah jong u ban ïalehkai bha ha ka motorsports, bad sha u Linthon M. Momin na bynta ka jingkyntiew jong u ha ka jingrekod bad ruh ban pynmih ïa ki jingrwai na rilum Garo.
Ha kane ka sngi la sam ruh ïa ki khusnam bad ki syrnod sha ka kynhun kaba tbit tam ha ka parade bad ïa ka nam lahduh la ïoh ban rah da ka Don Bosco Higher Secondary School Scout Troop bad ka St. Mary’s Higher Secondary School Guide Company. Katba ka St. Mary’s Higher Secondary School Scout Troop bad ka Christian Girls’ Higher Secondary School Guide Company ki la ïoh ïa ka nam kum ka kynhun ba wan ba ar.
Napdeng ki kynhun ba ïakhun na ka liang ki NCC, ka Tura Government College NCC Boys bad ka Don Bosco College NCC Girls ki la ïoh ïa ka khusnam kaba nyngkong katba ka Don Bosco College NCC Boys bad ka Pechon Memorial Higher Secondary School, Tura, ki la ïoh ïa ka kyrdan kaba ar.
Kum shi bynta jong ka jingrakhe, ka la don ruh ka iew ïa die ïa thied kaba shisngi kaba la pynlong ha DC Park, Tura ha kaba la don haduh 20 tylli ki dukan jong ki nongseng kam lajong. Ki tiar kiba die ha kane ka iew ki kynthup naduh ki tiar thain hi, ki jingshna ba pynmih hi na ka thain, ki kynja jingdeng, ki jingbam, ki jingpyni nam ïa ki jingdro jingpynwan dur bad kiwei kiwei.