Khliehriat Lber 08 : Ka ophis jong ka District Social Welfare Officer, East Jaiñtia Hills District bad ka ophis jong ka District Sankalp Hub for Empowerment of Women (DHEW), East Jaiñtia Hills District ha ryngkat ka jingiatreilang bad ka District Project Management Unit (DPMU), Megha- Lamp, MBMA, ka District Mission Management Unit (DMU), MSRLS, East Jaiñtia Hills District, ha ryngkat lang bad ka pyrthei baroh kawei, mynta ka sngi ka la pynlong ïa ka prokram ba kyrpang na ka bynta ki kynthei kaba long ka jingrakhe ïa ka Internation Women’s Day, ïa ka prokram la pynlong ha Khliehriat West Community Hall.
Ka phang pdeng jong kane ka sngi ka dei “Na ka bynta baroh ki kynthei, ki khynnah kynthei, ka hok ka jingialong kajuh bad ka jingpynkup bor”.
Ka MLA, jong ka 5-Sutnga-Saipung Constituency kaba dei ruh ka Chairperson jong ka Assembly Committee on Empowerment of Women, ka kong Santa Mary Shylla ka la long kum ka kongsan ha kane ka sngi bad ka MDC jong ka Narpuh ka kong Deivipaya T Tongper, kum ka symbud kongsan, la ïa don ryngkat lang ruh u Deputy Commissioner, East Jaiñtia Hills District, Shri Shivansh Awasthi, IAS, ka District Social Welfare Officer kaba dei ruh ka Member Secretary, District Hub for Empowerment of Women, East Jaiñtia Hills District, ka kong Rica Bareh, District Sports Officer, East Jaiñtia Hills District, kong. Stephanie M Rapsang bad kiwei kiwei.
Haba kren kum ka kongsan, ka kong Santa Mary Shylla ka la ai khublei Women’s Day ïa baroh ki kynthei kiba la wan sha kane ka prokram bad ong ruh ba ki kynthei ki don ka bynta kaba kongsan bha ha ka imlang ka sahlang bad iathuh ruh ba ka sorkar jylla ka shimkhia ban kyntiew ïa kino kino ki kam na ka bynta ka jingbit jingbiang jong ki kynthei bad halor kane ka la pynsngew ïa ki skim bapher bapher, ki jait prokram bapher bapher, ki poicy kiba pyntreikam da ka sorkar na ka bynta ban kyntiew ïa ki kynthei ha ka imlang ka sahlang, ka kyntu ruh ïa ki kynthei baroh ba ki dei ban mih shakhmat ban pyntip lada don kano kano ka jingshah ban beiñ, ka jingshah ibeiñ bad kano kano ka jingshah thom bor kaba long pyrshah ïa ki kynthei bad ka khot lang ruh ïa barph ki tnat treikam ban iatreilang ban kyntiew bad ruh ban iada ïa ki kynthei.
U Shivansh Awasthi, IAS, u la ong ka kane ka prokram ka dei kaba kyrpang na ka bynta ki kynthei bad ban rakhe ruh ïa ka jinglah jong ki kynthei ha ki kam ki jinglah jong ki ban noh syniang sha ka imlang ka sahlang ha kiba bun ki liang, haba kren shaphang kane ka jinglah jong ki kynthei ha ka imlang ka sahlang, u Shivansh u la ban jur ïa ka jingdonkam ban pynshai ïa ki jingeh ba ki kynthei ki mad ha kiba kum kine ki sngi, u kren ruh halor ka jingdonkam ka jingnang jingstad ïa ki kynthei bad u pynsngewthuh ïa baroh ki tnat treikam ba ki jingeh jong ki kynthei ki dei kita ki jingeh ha ka imlang ka sahlang, kumta man la kawei pa kawei ka tnat treikam ka dei ban shim ka jingkitkhlieh ban pyntikna ïa ka jingialong katjuh ha ki hok ha ka imlang ka sahlang.
Kiba la ai jingkren ki kynthup ka District Social Welfare Officer cum Member Secretary, District Hub for Empowerment of Women, East Jaintia Hills District ka kong Rica Bareh, ka kong Deivipaya T Tongper bad ka Programme Manager, MCSWA, ka kong Rinibeth Patlong.
Ha kane ka prokram la don ruh ka jingpynkup burom, ka Beti Bachao Beti Padhao Brand Ambassador ia ka kong Batbitbha Bareh, la ïoh ïa ki jingshad tynrai na ka kynhun jong ki nongtrei Anganwadi kiba na ka Saipung C&RD Block.
