Shillong, Naiwieng 09 : Ha ka rta kaba kiwei ki khunlung bun ki dang thlun ban kren hynrei u heprit ba dang 2snem 10 bnai na ka shnong Mylliem, Madan Iing Syiem u Jude Maynard Khyriem u la dep ban ïoh pdiang da ka khusnam Indian Book of Records 2025 kum u heprit uba stad tam.
Kane ka khusnam ba une u heprit u ïoh kadei namar ka jinglah jong u ban jubab lut ïa ki jingkylli kiba ïadei bad ka Solar System bad ruh halor ka haw haw kaba u pyndep haduh 76 tylli ki jingkylli tang ha ki 14 minit tam.
Ïa ka jingstad bad ka jingshemphang jong une u heprit la sakhi paidbah lang ruh ha kane ka sngi Saitjain ha ka jngïalang pynkupburom ïa ki samla pule ba pass bha ba la pynlong da ka NPP Mylliem.
Baroh ki kyndit haba ki nongpynïaid ki pynbna ba u heprit ba dang 2snem tam un jubab ïa ki jingkylli kiban sa kylli da u Paieid jong u hi u Paieid Richard Kharpuri.
Hynrei khlem bakla une u heprit u la jubab lut ïa baroh ki jingkylli ha ka ktien English kiba la kylli da u Paieid halor ka Solar System.
Na ka liang ka NPP kum ka jingithuh ïa katei ka jingshemphang jong u heprit Jude ka la pynlong ruh ka jingpynkup burom kyrpang ha kane ka sngi.
Lah ban kdew hangne ba une u heprit u dei u khun jong i Kong L Khyiem bad Bah Eric Bruce Nongkynrih bad u dei ruh u khun ksiew jong i Mei-ieid Mildora Khyriem bad Paieid Richard.
