Shillong, Nailur 06: U Lat ka jylla u C.H.Vijayashankar, mynta ka sngi Thohdieng ula leit ïakynduh ïa ka President jong ka ri ka Droupadi Murmu, ha Rashtrapati Bhavan, New Delhi.
Ha kane ka jingïakynduh u Lat ula pynsngew sha ka President ka Ri shaphang ki mat bapher bapher na ka bynta ban kyntiew ïa ka roi ka par bad ïa ka bha ka miat ha ka jylla Meghalaya baroh kawei.
Ka President kala pynpaw ïa ka jingthrang ba ka Meghalaya kan kiew ha ka roi ka par bad kala pynthikna ba kan ïai bteng ban ai jingkyrshan ïa ki jingangnud jong ka jylla.
U Lat bad ka President kila ïengskhem ba kin shimkhia ha ka ban kyntiew shaphrang ïa ka jylla bad ban shimkhia ïa ki mat kiba kongsan jong ka thaiñ. U Lat ula wer sngewbha ruh ïa ka President jong ka ri India ba kan wan biang sha ka jylla Meghalaya.
Ka jingïalang kala ïakren ruh ïa ka jingdonkam ban don ka jingïatreilang hapdeng ka sorkar jylla bad ka sorkar pdeng da ka jingthmu ban kyntiew ïa ka jingim jong ki paidbah bad ban noh synniang ïa ka jingkiew shaphrang jong ka ri.
