Ha ka por u (L) Dr. Donkupar Roy ym ju ïohsngew ba ka UDP kan shah khot kum ka party shong tnum Bos

Kan long kaei kaei kaba sngewieid da shisha ba ki arngut ki MLA, ba dang thymmai jong ka seng UDP, U Bah Olan Suiñ bad U Bah Pius Marweiñ, ki la kren ïa ka jingshisha, kaba don ha ka tyllong dohnud jong ki bad kaba la da mih shisha naduh ka mynsiem jong ki bad ha kaba ki pynshai, ba ka Secretariat, kaba ki ïashong treikam lang mynta bad ka seng NPP, kam don satia ïa ka tnum jong ka bos, hynrei ba ki ïatreilang ha kajuh ka jaka bad ha ka sorkar synrop jong ka MDA.
Ha kaba ïadei bad kane bad halor kane ka mat, kaba ki heh jong ka seng UDP, ki sngew sah khynnah lehse, ka dei hadien ba U Dr Donkupar Roy, nongïalam barim jong katei ka seng bad ngim shym la kynmaw ïa kitei ki kyntien pohjait bad ki kyntien pynhiar dor ïa ka seng synrop, kaba ïatreilang ha ka sorkar ba kan mih, kumba ka mih ha kine ki sngi kiba mynta bad katei ka dei ka jingkhraw jong u Nongïalam jong ki, ha kaba ki riew saiñ pyrthei jrong thylliej, kim nud satia ban balia siang sdieh katba ki mon,
Kam dei tang kata, hynrei ngi kynmaw ruh ha kitei ki por jong ka jinglong nongïalam jong U (L) Dr Don kupar Roy, ba ka NPP, ka pyndem toiñ ïalade ha ki nongïalam jong ka UDP, ha kaba wat ïa ka shuki myntri ba la aiti ha ki, ym shym la nud satia ban mushlia, kumba ka jia ha kine ki sngi.
Ka jingkren halor ka shong tnum bos, ka la pynhiar dor haduh katta katta ïa ka UDP, kaba dei ka paralok jong ka sorkar MDA bad kane ka jingkren, kan ktah jubor ïa ka seng NPP bad ka UDP, ha kaba ki paidbah, ki la ngiah ki la jlep, na kine ki jait jingkren “pynbiej man ka san snem” bad nangta sa ki jingkren “shong tnum bos” bad tang kitei ki ar tylli ki kyntien, kin plie lad ïa ki seng kiba ïaleh pyrshah sorkar, ba kin nang ïoh bor ha ki sngi ban wan.
Sngewieid ïa ka jingkren jong kitei ki arngut ki MLA, ba dang thymmai jong ka seng UDP, ha kaba ki kren ïa ka jingshisha ha kane ka juk jong ka sorkar synrop, ha kaba wat ka BJP ruh ka dang donkam ïa ki seng tit ban synshar kat ïa ka sorkar India ha Delhi.
Wat la ki kren ïa ka jingshisha, hynrei katei ka bih, ka la ngam mynta sha kylleng ka ri Khasi Jaiñtia bad kan shim por ban sait khuid ïa katei ka jingkynnoh kaba la ktah matïong ïa ka seng UDP hi baroh kawei bad ka don sa tang kawei ka lad bad kata ka long, ba lada ka UDP, kan mih noh na ka sorkar MDA, ïoh lehse ka lah ban lape malu mala ïalade ha shwa u snem 2028.
Ka jingshah kynnoh ba ka UDP ka da kwah hir hir ban ïoh tang ban shong hapoh ka tnum jong ka bus ka la paw shai ba tang na ka bynta ka shuki Myntri kaba dei ka bhah jong ka party UDP hapoh ka MDA 2 la ïohi ba mih ki jingïakynad hapdeng ki MLA jong ka, na ka daw ka jingshah knieh noh ka shuki bad ka jingïasam doh kyndang.
Na kane ka daw lehse ka la pynlong ïa ki para MLA ka party UDP ban wad daw ïa la u jong u President ka party halor ka tnat kaba u la khmih bad peit mynta kum u Myntri sorkar kaba ïadei bad ka jinglip bording kaba khah ha ka Nongbah Shillong.
Kane ka jingkwah ïoh shuki mynta ka la paw shai ba ka jingkwah long MLA bad ban don hapoh ka sorkar ka long shisha tang na ka bynta ka shuki ym ban synshar ne ban pynbha ïa ka synshar ka khaddar hynrei ka lah ban long lehse na ka bynta ka bha ka miat ne kaba dei tang na ka bynta ka bha ka miat jong ki nongshong shnong jong ka Jylla.
Ka jingshah pynhiar shuki jong ki Myntri sorkar kiba la sdang ïa ka kam naduh ba sdang ka jingsynshar jong ka sorkar kaba don ha ka bor ka long kaei kaei kaba ktah bha ïa ka jylla bad ïa ki nongshong shnong naba lada ïoh ïa u Myntri uba bat ïa kano kano ka tnat uba don jingthmu ban wanrah jingkylla bad ban kyntiew ïa ka jylla lyngba ki sap, ki phong, ki jingshem phang bad jingnang jingtip jong u ne ka Myntri sorkar, kan pulom noh naba dang mar shiteng ki kam ruh ym pat dep la hap aiti noh sha kiwei ia ka tnat sorkar kaba ki la trei naduh ba sdang bad khamtam eh lada ïoh bat pat da uwei u MLA kum u Myntri ia kano kano ka tnat kan pulom noh baroh ki sienjam ba la leh da ki Myntri sorkar barim kiba kwah wanrah jingkylla ha ka jylla.
Wat u Myntri Rangbah ka jylla ruh um lah ban leh eiei halor kane ka jingïateh kular hapdeng ki seng saiñ pyrthei tang na ka bynta ban pynhun bad ban pynneh ïa ka sorkar, watla mynta ka NPP ka la lah ban synshar hi ïa ka sorkar khlem ka jingkyrshan lem kiwei ki party, hynrei namarba kam shaniah pat ïa kaei ban jia pat hadien u snem 2028 kumta kam banse ban paiñ ïing ïa kiwei pat ki seng riewlum bad seng ri thor hapoh ka sorkar.