Shillong, Jylliew 28 : Ka jingïalehkai ha ka Shillong Premier League hynne ka janmiet ka la long kaba shongshit bha kaba la pynlong ïa ka jingïakhun ban kut noh da ka jingïakhaid kaba mar 1-1 kol hapdeng ka Nangkiew Irat bad ka Shillong Lajong.
Ha ka jingïalehkai kaba long ha madan Third Ground Polo, dei ka Shillong Lajong kaba ïoh ban thep kol shwa lyngba u Sangti Janai Shianglong ha ka minit kaba 14. Watla ka jingïalehkai ha ka kylla step ka long ka long kaba mar ïa biang bor hynrei ka Nangkiew Irat ka khlem ïoh satia ban pynïakhaid ïa ka jingïakhun ha katei ka kylla.
Katei ka rukom ïalehkai ka dang bteng wat ha ka kylla miet ha kaba baroh arliang mamla kim shym la ailad satia ïa ki rangïalehkai shakhmat ba kin pynkhih jar biang. Pynban dei ha ki minit kiba khatduh bad ha ka por ka bym poi pyrkhat ba u Damanbha Chyne u la ïoh ban thep ïa ka kol kaba donkam tam na bynta ka Nangkiew Irat ha ka minit kaba 90+3.
Haba phai dien sha ki jingïakhun kiba la dep hadien ka jingïakhaid kaba mar 2-2 kol pyrshah ïa ka Langsning FC, ka Nangkiew Irat ka la pynkhreh bha ryngkat ka jingkyrmen ban khur point bun. Katba na ka liang ka Shillong Lajong pat, katei ka kynhun kaba la shah lamkhmat lypa da shi kol ha ka jingïakhun kaba lapynsangeh noh pyrshah ïa ka Mawlai dang shen, ka hap ban pyndep ïa ki minit kiba dang sah ha kane ka sngi Thohdieng.
Tad haduh mynta ka sngi, ka Shillong Lajong watla ki la lait mynta na sha trai duh jong ka miej kheiñ point hadien ba ki la ïoh ban khur shi point hynrei ka neh ha ka kyrdan kaba 7, kata da kaba tam ïa ka Mawkhar SC da kaba ïapher ha ka jingthep kol (-1 kol la -2 kol). Katba ka Nangkiew Irat pat ka don mynta ha ka kyrdan kaba hynriew da ki ar point.
Ha ka jingïakhun kaban long ha ka sngi Palei, ka Mawkhar kan hap pat ban ïakhun pyrshah ïa ka Ryntih ha kajuh ka por bad ha kajuh ka jaka.
