Shillong, Naiwieng 04 : U Nongïalam ka Liang Pyrshah ha KHADC Bah Titos W Chyne ha ka sngi Nyngkong u la ong ba ha kaen ka elekshon MDC, ki paidbah ki klet ïa ka party lada jia ba don u kyrtong uba biang.
Haba kren bad ki lad pathai khubor, u Bah Titos uba dei ruh u MDC ka Shella bad CEM barim ka Council u la kubur ruh ba ka jingmih jong kano kano ka seng saiñpyrthei ba thymmai kan don beit ka jingktah ïa kino kino ki party.
“Tangba ha ka elekshon MDC pat ki paidbah ki jied kyrtong bad kim da peit than eh ïa ki party,” u la ong.
Shuh shuh u Bah Titos u la ong ruh ba ka jingmih jong ka VPP kan ym ktah tang ïa kawei ka party hynrei ka lah ban ktah lut. “Kam mut ba kane kan ktah tang ïa kawei ka party hynrei phi ïohi kumba long mynta ka Congress ruh ka hiar bha watla mynshwa ka khlain bha bad don haduh 20 ngut ki MLA bad bun ngut ki MDC hynrei mynta sah sa tang uwei u MLA bad arngut ki MDC. Kumta phin ong shano kine ki Congress ki leit?”
Nangta u ong ruh ba lada phai sha ka UDP mynshwa ka tlot hynrei ha ka elekshon ba la dep ka khlain namar na ka 6ngut ki MLA ka kiew sha ka 12 ngut ki MLA bad ki MDC mynshwa kim ju ïoh ban ïalam ïa ka Executive Committee hynrei ha kane ka samoi ba mynta ki la ïoh ban ïalam ïa ka Executive Committee kumba lai snem tam.
“Te kumno ngin ong ba ngi tlot ne ngi khlaiñ. Tangba ha ka elekshon MDC ka don ka jingïapher namar kadei ka elekshon ha man ki constituency. Kumba phi tip ha ki constituency hi ki paidbah kim ju kham peit ïa ka party hynrei ki peit ruh ïa ki kyrtong kiba kumno bad kiei kiba mih ban aireng.”
Utei u MDC ba la jop bunsien na Sohra u ïai ban ruh ba ha kane ka elekshon MDC kaban wan baroh ki party kin jop tangba mar katno ngut kin ïoh kata ka shong ha ka bor jong u paidbah ban rai.
