Ha ka Manifesto kular ka UDP ban dang pynkhlaiñ ïa ka 6th Schedule bad ai bhah thungkam ïa ki PWD

Shillong, Rymphang 05 : Ka United Democratic Party (UDP) ha ka sngi Balang, kala kular ban nang pynkhlaiñ shuh shuh ïa ka Sixth Schedule ka Riti Synshar ka Ri bad pyntreikam ïa ka bhah thungkam ba 3% ïa ki briew ba duna dkhot met ne Peoples With Disability (PWD) lada ka shah jied ban wan ha ka bor ha ka elekshon Autonomous District Council (ADC) ka Ri-lum Khasi bad Jaintia, ka ban long la 21 tarik Rymphang.
Kine ki dei ki mat kular elekshon (manifesto) napdeng ki 20 tylli ki mat bala pyllait paidbah da ka UDP ha ka jingïalang ba long hynne ka sngi ha ka jingdonlang u Myntri Sorkar Bah Paul Lyngdoh, u CEM barim ka KHADC Bah Titosstarwell Chyne, u General Secretary Bah Jemino Mawthoh, ki MLA bad MDC naor ki nongtreikam ka party.
Ka UDP kala kular ruh ba kan pyrshah jur ïa kano kano ka jingthmu ban tih uranium bad pyntreikam ïa ka Uniform Civil Code (UCC) hapoh ka Jylla.
Ka UDP kala pynïeng haduh 40 ngut ki kyrtong ha kane ka elekshon ba kynthup ïa 23 ngut ki ban ïakhun na ki constituency ka KHADC bad 16 ngut na ki constituency ka JHADC.
Haba kren sha ki lad pathai khubor, u Bah Titos ula ong “Ngi kular ban buh bhah ba 3% ha ka thungkam thungjam ïa ki briew ba duna dkhot met ha ki District Council. Kane ka dei ha ka sien ba nyngkong ba kino kino ki party kin shimkhia ïa kane ka kam. Ngi kmen eh ban pyntreikam ïa ka 3 % ka bhah thungkam ïa ki briew ba duna dkhot met lada shah jied ban wan ha ka bor”.
Haba ban jur ïa ka jingdonkam ban pynkupbor ïa ki ADC, une u MDC ka Sohra bad Nongïalam ka Liang Pyrshah ha KHADC ula ong “Ngi kwah kham bun ka bor ïa ki ADC khamtam ha ka jinglong trai ïa ka khyndew ka shyiap bad kawei pat ba ïadei bad ka para 3 jong ka Sixth Schedule”.
“Ngi la dawa ruh ban bishar biang ïa ka para 12(a) (b) jong ka Riti Synshar ka Ri bad ngi kwah ruh ban pynkylla ïa ki katto katne ki kyndon ba ïadei bad u Lat ka Jylla haba phai sha ka jingai jingbit ïa kino kino ki Bill ba mynjur da ki ADC haba phai ka Article 200 jong ka Riti Synshar ka Ri” ula ong.
Haba pynpaw ba ka UDP ka kwah eh ban pyntreikam ïa ka nongrim jong ka aiñ kyntiap seng ha baroh ki ADC, u Bah Titos ula ong ba kane kan ïarap ban tehlakam ïa ka jingkynthih diengkper jong ki MDC hadien ka elekshon.
Ula pynpaw ruh ba ka UDP ka pyrshah jur ïa ka jingthmu ban kynthup ne shu jied ïa u MDC ba shusieh na ki Jaidbynriew Riewlum bym don nongmihkhmat (unrepresented Tribe) bad ruh ïa ka jingpynjari ïa ka Uniform Civil Code (UCC) ne kino kino ki Bill kiba long pyrshah ïa ka bha ka miat ki paid riewlum.
U Bah Titos ula ong ruh ba ka manifesto kala ban jur bha halor ka jingkongsan ka synshar khadar ba khuid nalor ka jingkyntiew ïa ki nongsumar dawai kynbat, ka jingïada ïa ki khlaw bad ‘Law kyntang bad pyntreikam ïa ka Solid Waste Management Act kumba ka long.