Shillong, Naitung 25: U Bah Banteidor Lyngdoh, MLA ka Mawkynrew Constituency bad Myntri ba dei khmih ïa ka tnad kam rep ka Sorkar Jylla, ha ka 25 tarik u Naitung, 2022, u la plie ïa u mawnongrim kum ka dak ban tei noh ïa ka ïew nongrep ne ka Farmers’ Market ha Jatah.
Ka mang tyngka ban tei ïa kane ka ïew ka long 65 lak tyngka bad na kane 50 lak tyngka ka dei kaba u Bah Banteidor u la pynïoh na ka North Eastern Council bad 15 lak tyngka na ka Meghalaya Basin Management Agency (MBMA) Meghalaya -Livelihood and Access To Markets Project (M-LAMP).
ïa ka jingïalang plie ïa une u mawnongrim la khot pynlong da ka Jatah Integrated Village Cooperative Society ha ka shnong Jatah Nonglyer.
La ïa donlang ha kane ka sngi da u Bah D Hynñiewta, ADC East Khasi Hills, u Bah AS Suting, DPM M-LAMP, u Bah M Marbaniang, ki dkhot ka Society, ki nongïalam shnong, ki riewrangbah, ki nongshong shnong, ki khynnah skul nalor kiwei pat.
U Bah Banteidor haba kren kum u kongsan ha ka jingïalang u la ban jur halor ka jingdonkam ban kyntiew ïa ki nongrep lyngba ki ïew nongrep.
Da kaba pyntip ba u la dep ban buh ïa u mawnongrim na ka bynta ka ïew ha Jongksha, u la ong, “Nga kwah ba kine ki ïew kin treikam ban long ka jingmyntoi ïa ki nongrep bad ym ba kin long ïing jah”, u la ong.
U la ong ba kine ki ar tylli ki ïew ki don ha ki jaka ba long pdeng bad kiba ki paidbah kin suk ka leit ka wan kumjuh ban pynpoi ïa ki mar rep.
