Jowai, Naitung, 23: Ka samla Jessica Siangshai ka khun kynthei jong u Bah Karme Kharwanniang bad ka Kong Shida Siangshai, ka la ïoh rung ha ka kyrdan ba khyndai ha ka Merit List jong ka B.Sc (Mathematics) ba la pynbna ha ka 18 tarik mynta u bnai da ka skulbah North Eastern Hill University (NEHU), Shillong.
Ka Samla Jessica Siangshai ka dei ka samla pule jong ka Lady Keane College, Shillong.
Na ka liang ka Kur Phawa Siangshai, Khliehriat Unit ka dap da ka jingsngewkmen kaba khraw eh ban tip ba ka khun jong ka Kur ka la ïoh rung hapoh ka Top Ten List mynta u snem. Ka Kur ka kitbok kitrwiang ba ka samla Jessica kan nang leh bha shuh shuh ïa ki jingpule ba shalor ha ki por ki ban dang wan.
