Ha ka kyrdan 2nd Division yn mih aireng ka Nongmynsong mynta u snem ha madan Polo
Khlieh dor ka kynhun ba lait thylli kawei ka jaka
Shillong, Ïaiong 22 : Ka Nongmynsong Sports & Cultural Club mynta u snem ka la pyntikna ba kan ïoh mih madan lang ha ka lympung ïalehkai jong ka Second Division Football league jongka Shillong Sports Association.
Ka jingïoh ka Nongmysong S&CC kadei hadien ba ka la lah ban khlieh ïa ka dor kaba 2.30 lak ban ïoh ïa kane ka kabu ksiar.
Ïa kane la pynpaw da u Working President ryngkat ka jingïadon lang u Vice President bad Secretary ka SSA Bah Robert Dkhar, Bah Cliff R. Nongrum bad Bah D.L Nongbri, hadien ba ki la bishar bad khmih bniah ïa ki kot ki sla ba donkam.
Kane ka jinglait thylli jong kawei ka jaka ha ka lympung ïakhun ka Second Division kadei hadien ba ka Nongkseh SC ka la thied noh pat ïa kawei ka jaka kaba lait tylli ha ka First Division.
Kumta khnang ban lah ban pynbiang ïa ka jingdon jong ki kynhun ha man la ki division, ka SSA ka la pynsaphriang ïa kane ka jingpyntip tang sha ki klob kiba la pynïasnoh bad ka. Kumta, kane ka la plie lad ïa ka Nongmynsong ban ïoh jaka da kaba khlieh ïa ka dor na bynta kawei ka jaka ba thylli ha ka second division ban pyndap pura 14 tylli ka jingdon ki klob.