Nongpoh, Risaw 01: Kum uwei naki nongaibuit ba rangbah jong ka Ri-Bhoi District Cricket Association, u Bah Sosthenes Sohtun u ba la shah jied ruh kum u Myntri ka sorkar jylla dang shen bad haka juh ka por u ba dei ruh u MLA bad MDC ka Jirang Constituency mynta ka sngi u la shah pynkup burom haka Ri-Bhoi District Cricket Association namar ka jingshah jied jong u ban rung haka kynhun myntri ka jylla kaba long ka jingsarong kaba khraw ïaka kynhun RBDCA baroh kawei.
Ïa kane ka jingïalang pynkup burom la pynlong ha madan ïalehkai kriket ka RBDCA ha Pahamsning Nongkhrah, bala sakhi ruh da ka jingdonlang ka kong Rona Khymdeit MDC ka Nongpoh, u Rubul Ali Officer in Charge ka tnad Traffic ha Nongpoh, u Bah Rayonald Kharkamni President ka RBDCA ba dei ruh u Honorary Secretary ka MCA, ki nongïalam ka RBDCA naduh u Bah Ferdinald Kharkamni Vice President, Bah Michael Kharhunai Secretary bad kiwei kiwei lem bad ka kynhun ïalehkai kriket na Ri-Bhoi District.
Haba kren ha kane ka sngi u Bah Sosthenes Sohtun kum u myntri sorkar ba bat ïaka tnad C&RD, GAD bad SAD u la pynpaw ka kam ïalehkai ka dei kaba don haka dohnud jong u bad u dei uwei uba ju sngewtynnad ban ïalehkai ïaki jait jinglehkai bapher bapher naduh ka football, ka badminton, ka table tennis bad kiwei kiwei ha kaba u la ong ruh ba haka kam ïalehkai nga dei u Jack of all trade, master of none.
U la ong ruh ba kam ïalehkai kriket kadei kawei naki jait jinglehkai kaba um ju sngewtynnad haki por ba mynshuwa hynrei haka jingïaid jong ka por u la shim bynta haki jinglehkai kriket bapher bapher bad pynlong pynban ba un sngewtynnad ïa kane ka jinglehkai kaba la sdang ruh ban kiew hapoh ka district bad ka jylla jong ngi.
Shuh shuh kum u myntri u la kyntu ruh ïaki rang bad ki thei ïalehkai kriket kiba don ha katei ka sngi ba kin pynleit jingmut ban kilan bha ïalade namar kum ka district ka kyrmen ban mih ki rang bad ki thei ïalehkai ki ban poi ruh sha ki kyrdan ba shalor haka jylla bad haka ri India.
