Ha ka jingrakhe 25 snem ka Salantini Janera, banjur u Conrad ïa ka jingdonkam ka ktien lajong

Shillong, Nailar 30: Ka Salantini Janera, kaba dei ka kot khubor ka jylla Meghalaya ha ka ktien Garo kaba mih manla ka sngi, ka la rakhe ïa ka jingdap 25 snem hapoh ka Hotel Polo Orchid, Tura, ha ka sngi saitjaiñ.
Ïa kane ka jingrakhe la pynlong ha ka jingïadonlang u Myntri Rangbah ka jylla u Conrad K. Sangma kum u kongsan ha ryngkat u dkhot ka Parliament u Saleng Sangma bad u nongïalam ka liang pyrshah u Dr. Mukul Sangma kiba la shim bynta kum ki symbud kongsan. U Deputy Commissioner ka West Garo Hills u Vibhor Aggarwal, IAS, u la shim bynta lang ha ryngkat bad kiwei kiba la shah khot sngewbha.
Ha ka jingkren u Myntri Rangbah u Conrad K. Sangma u la ai khublei ïa ka Salantini Janera ba la pyndep ïa ka jingïaid lynti kaba la 25 snem ban ai ka jingshakri sha ki paidbah jong ka Garo Hills bad ka Meghalaya.
Haba kren shaphang ki jingïai don ki kot khubor na jylla khamtam ha Garo Hills, u Myntri Rangbah u la ong, “Ha shwa ban don bynta bha hapoh ka saiñ pyrthei u kpa jong nga u (L) P A Sangma u la sdang ïa ka kot khubor ha ka ktien Garo kaba la khot kyrteng ka Chadambeni Ku’rang, hynrei khlem lah ban pynneh na ka daw kiba bun ki jingeh.”
U la ïaroh ïa kane ka kot khubor ba ka la ïaineh, ka la bteng bad ka jingshlur ban ïai shon ïa ka kot khubor wat hapdeng kiba bun ki jingïaleh, naba ban ïaineh haduh kine ki 25 ka la dei ka kam kaba ai mynsiem.
U Myntri Rangbah u la banjur halor ka jingdonkam ban kyntiew ïa ki ktien ka jylla da kaba ong, “Kum ki nongshong shnong kane ka jylla jong ngi manla iwei pa iwei dei ban nang ïa la ka ktien khamtam ka ktien Khasi, Garo bad Pnar bad dei da kane ka jingthmu kan pynlah ïa ki nongshong shnong ban ïoh ki sap kiba la sorkar ka dang trei ban wanrah ïa ka ktien Khasi bad Garo ha ki skul kum subject kiba kongsan.”
U la ong ba ka sorkar jylla ka dang ap ïa ka jingai jubab kaba bha na ka sorkar pdeng halor ka jingdonkam ban pynrung ïa ka ktien Khasi bad Garo ha ka 8th Schedule.
U Myntri Rangbah u la banjur halor ka jingdonkam ki nongïalam ki seng saiñ pyrthei bad ki lad pathai khubor ban ïatreilang sa ka jingïasngewthuh, ka jingtrei kaba shai bad ka jinglaitluid na ka bynta ka jingbha.
Katba u Saleng Sangma u la ong ba kane ka jingrakhe kadei ka burom ban sakhi bad ban don bynta lang da kaba khot ïa ka Salantini Janera ym tang ba kadei ka lad pynïasoh hynrei kadei kaba pynkhih dalade.” Haba banjur ïa ka jingkongsan jong ka ktien lajong, u la ong, “Haba ngi kren bad ngi sngap ïa la ka ktien lajong, ka thaw ïa ka jingsngew kaba pher, ka sawdong sawkun kaba pher.”
U la pynpaw ïa ka jingsngewkhia halor ki jingshah iehbeiñ kiba bun ki ktien jong kane ka thaiñ shatei lammihngi ha ka ri, da kaba kdew ba ki la don haduh 22 tylli ki ktien ba la ithuh hapoh ka riti synshar ka ri, kiwei pat ba kynthup ïa ka ktien Garo ka sah shabar na kane ka mat pyrkhat kam wat hapdeng ka jingnang jingtip ha ka thoh ka tar bad kiba sah ha ka khana pateng.
U la pynpaw ba ïa ki competitive examination kum ka IAS bad IPS ba dei ban shah ha ki ktien lajong khnang ba ki kynhun jaitbynriew riewlum kin ym shah ieh beiñ ban ïoh kine ki lad.
Na ka liang u Dr. Mukul Sangma u la ai khublei ïa ka Salantini Janera ba ka la kynjoh ïa une u mawmer jong ka jingdap kaba 25 snem wat hapdeng kiba bun ki jingeh ha ki lynti ïaid jong ka.
U la pynpaw ba ki lad pathai khubor ki long kiba kongsan ha ka synshar paidbah, ki trei kum ki nongpeit pyrman ban pynthikna ïa ka jingsynshar kaba khuid, kaba ïaid beit bad kaba don ka jingkitkhlieh ha ka synshar khadar. U la ong ba ka Salantini Janera kum kaba kongsan na ka bynta ki paidbah ka Garo Hills.
Katba u Manas Chaudhuri, Proprietor ka The Shillong Times, u la ong ba kane ka jingdap 25 snem kum ka khana ban sah kynmaw kaba long ruh ha ki artylli ki daw, kaba nyngkong ba ka Salantini Janera ka la long ka kot khubor kaba nyngkong ki jaitbynriew Garo kaba la neh haduh 25 snem kaba ar pat ka long ba kane ka jingrakhe ka la wanrah lang ïa u Myntri Rangbah, u nongïalam ka liang pyrshah bad ïa u MP hajuh ka rynsan ha kaba kane ka pynphalang ïa ka mynsiem ka jingïalong kawei.
U la kyntu ïa ki nongpule ban pyndonkam bha ïa kane ka rynsan kaba long ka sur ba don jingsngewkhia bad ki jingangnud, da kaba pynthikna ïa ki da kaba ong, “Lada phi thoh ha ka kot, kan poi sha ka meij jong u Myntri Rangbah.”