Ha ka jingphuh jingphieng, rakhe dap 50 snem ka skul Seventh Day Adventist ha Lyngïong

Lyngiong, Risaw 24: Ka Seventh Day Adventist English Secondary School, Lyngïong ka la ïoh ban rakhe ïa ka jingdap 50 (sanphew) snem ka jong ka ha ryngkat ka jingphuh jingphieng lyngba da ki jingshad jingrwai bad ki jingkren na ki ‘riew pawkhmat kiba la ïadon ryngkat ha ka jingrakhe.
U bah H.M. Shangpliang kum nongaibuit ka tnat pule puthi ka sorkar jylla u la long kum u kongsan bad ha ka jingkren jong u, ula pynpaw ba ka jingïohi jngai ki missionary ban wan seng skul ka long ka jingmyntoi ïa ki paidbah jong ka thaiñ bad ka long ka kabu ïa ki nongshong shnong kane ka thaiñ ban ñiewkor ïa kane na bynta ka jingnang jingstad.
U bah Lamphrang Blah kum u shongknor ka KHADC uba long ruh u MDC ka thaiñ u la ong ba ka long kaba kongsan ba ki khynnah skul kin minot ha ka jingpule jong ki khnang ba kin nangkiew shaphrang.
U bah Kennedy C. Khyriem u nongmihkhmat barim ka thaiñ u la ban jur ba ki kmie ki kpa ki don ka bynta kaba khraw ban buddien ïa ki khun da kaba leit sha ki jaka pule jong ki ban sngewthuh ïa ka jinglong ki khun ban ïasyllok bad ki nonghikai.
U bah Staising Kharbteng uba long u khynnah skul barim kane ka shlem ai jinghikai ha ka jingkren jong u ula ai jingmut ïa ki khynnah skul ba ki donkam ban don ka jingthrang ha ka jingim jong ki, khnang ba ki long ki nongjop ha ki jingïaleh.
U Pr. S. Hynñiewta u President ka Khasi Jaintia Conference ka Balang Seventh Day Adventist u la ong ba ka thong jong ka Balang ban buh ïa ka skul ha ki dong ki thaiñ ka long ym tang ban ai ïa ka jingnang jingstad hynrei ka long ban tei ruh ïa ka longbriew manbriew ha ka akor ka burom.
Ha kane ka jingrakhe la ïoh ruh ban pule ïa ka khana ne history shaphang ka jingïaid lynti jong ka skul kaba la sdang naduh u snem 1974 na u bah Kliphi Kharbteng uba pynkynmaw ba ka kong I. Laloo ka dei ka nonghikai ba nyngkong eh katei ka skul.
Kiwei de kiba la ïadon ryngkat ruh ha kane ka sngi ki long u bah K. Nongsteng, Blcok Development Officer jong ka Mawphlang C&RD Block, u Ma H.L. Ryntathiang u Lyngdoh ka Lyngïong Lyngdohship, ki Pastor, ki Rangbah Shnong, ki nonghikai na ki skul ba marjan, ki nonghikai ba rim, ki kmie ki kpa bad kiwei kiwei.
Nangta, la ïoh ruh ïa ka jingkren pdiang sngewbha na u Pr. S. Hadem, ka jingai kren ai khublei na u babu A. Shylla u Headmaster ka Seventh Day Adventist English Secondary School, Lyngïong bad la pynïaid ïa ka jingrakhe da u babu D. Shadap bad ka Miss D. Suchiang.