Ha ka jingphuh jingphieng pynkut noh ka Tyngnger UP School ïa ka jingrakhe dap 75 snem jong ka skul

Mawkyrwat, Nohphrah 07 : Ka Tyngnger Upper Primary School ha ryngkat ka jingphuh jingphieng ka la ïoh ban pynkut noh ïa ka jingrakhe lehkmen ïa ka jingdap 75 snem jong ka skul ha ka jingïaid lynti jong ka ban ai jinghikai ha kaba ïa dei bad ka jingnang jingstad, ka akor ka burom ba ki dei ban leh bad ha ka rukom im kum ki khynnah skul.
Lah ban pynkynmaw ba ïa kane ka Tyngnger Upper Primary School jong ka Tyngnger District la sdang naduh u snem 1950 kaba hapoh ka jingïalam jong u (L) Rev. Trevore Rodborne kum u nongseng jong ka bad u babu Nobulis Bonney u Headmaster ba nyngkong ha u snem 1952 – 1986 bad u babu Bridar Rose Lyngdoh kum u nonghikai ba nyngkong eh ha u snem 1950 – 1995 ba la don tang khyndiat eh ki khynnah ha kitei ki snem bad mynta pat ka la roi haduh katta katta namar ki khynnah ki don shisha ïa ka mynsiem ban wad ka jingnang jingstad.
Ha kane ka sngi, ka la don ruh ka jingplie ïa ka ïing skul ba thymmai da u bah D.P. Wahlang, Chairman jong ka Board of Directors, SPV Society, Shillong, ka jingpyllait ïa ka thup sah jingkynmaw ne Souvenir da ka kong M.M. Marweiñ, ka jingplie ïa u maw tablet da u Rev. S. Syiemsad, Chairman jong ka District.
Nangta, la ïoh ruh ki jingkren ai mynsiem ne ai khublei Platinum Jubilee na ka Tyngnger District, na ka kong B.B. Bynney kaba dei ka nonghikai ba rim bad na ki khun jong u (L) Rev. T. Rodborne, bad sa ki jingkren lyngkot na u bah D.P. Wahlang, Chairman jong ka Board of Directors, SPV Society, Shillong bad na u bah Ollan Sing Suiñ, MLA ka Mawsynram Constituency.
U Bah D.P. Wahlang, Chairman barim jong ka Board of Directors, Special Purpose Vehicle Society, Shillong haba ai jingkren ha kane ka sngi u la ïathuh ba na ka liang ka Special Purpose Vehicle (SPV) ïa mynta ka la don ha ka lynti jong ka jingpynkhreh na ka bynta ban shna pynheh ïa Tyngnger Upper Primary School ban kyntiew noh sha ka Secondary School khnang ba kan long ka jingïarap ïa ki khynnah skul namar ynda ki pass na Upper Primary kim donkam shuh ban leit sha kiwei ki jaka kum sha Mawsynram ne wat haduh ha Shillong tang bteng ïa ki jingpule hynrei tang ha shnong la jong ruh ka la biang pura.
“Da kane jingpyrkhat kan ïarap shibun ïa ki khynnah bad ki longïing longsem kiba duna ka ïoh ka kot”, ong u bah Wahlang bad ong ruh ba ka shong sa ha ki nongpynïaid skul ba kin buddien ïa kane ka kam khnang ba la dep ban pruit dak kin long kaba jop.
Ïa kane ka jingrakhe dap 75 snem la plie naduh ka 12 tarik u Rymphang, 2025 bad pynkut mynta ka sngi ka 4 tarik u Nohprah, 2025. Kiwei de ki program kyrpang ha kane ka sngi ki long ka jingrwai kyrpang, ka drill, ka action song na ki khynnah skul.
Hadien ka kut ka program kum ka dak jong ka jingkmen ki la ïoh ruh ban ot ïa u cake bad ba la aiti ha u bah P. Dkhar, CEO jong ka SPV Society, Shillong.