Shillong, Nohprah, 07: Ka Khasi Student Union (KSU) ha ka sngi Saitjaiñ ka la kynmaw burom ïa ka lyngkhuh sngi ïap ba 30 snem jong u Bah Bull Lyngdoh uba dei u nongïalam barim bad ïa ki matti kiba u la prat mynba u dang long u President jong ka KSU.
Hapoh ka jingïalam jong u President u Samla Lambokstar Marngar kumba ju leh manla u snem ki dkhot ka KSU ki la leit ban kynmaw burom ïa ka lyngkhuh sngi ïap jong u Bah Bull bad ban buh syntiew ha u durmot uba la shna hajan ka Law College, Dhanketi.
U Bah Bull N. Lyngdoh uba ki paidbah ki ju tip kum u Bah Bull u dei u President basaw jong ka KSU bad uba la shimti ïa ka kam President ha u snem 1983 tad haduh u snem 1990.
U Bah Bull u pawkhmat bha halor ka jingïakhih pyrshah ïa ki Nepali ha u snem 1987 kaba la tip ruh kum ka 2nd Anti-Foreigners Movement hadien ka jingïakhih pyrshah ïa ki Kharbang ha u snem 1979.
Hynrei u Bah Bull u khlem pyndem, ka jingïakhih ka la ïai bteng bad ki Nepali ki la phet na Mawlai, na Lower Mawprem, na Nongmensong bad Ri Bhoi. Namar ka jingshah tied bad shah pynshitom ha ki bor Pulit, u Bah Bull um lah kyrda shuh na ki jingpang bad u la khlad noh na ka pyrthei ha ka 7 tarik, Nohprah 1994 ha ka rta ba dang 42 snem.
Dei hadien ba u la shongthait noh ha u snem 1990 ba u Bah Bull u ïohi ba ka kam ka dawa ban rung sha ka jylli jong ka saiñpyrthei namar ka eh bha ban shu ïakhih ha madan bad donkam ruh ban rung ha Iingdorbar Thawaiñ. Ha u snem 1990 hi u la ïakhun ïa ka elekshon na Malki-Nongthymmai Constituency bad u la jop donburom hynrei hadien ba la pyndep ïa ka samoi treikam u la sangeh noh ban ïaleh elekshon namar ka jingingiah ïa ka jingjyrsieh ha ka politik.
Ha kine ki snem um shym la don shuh hapdeng ka met kaba shait ba khlaiñ bad ka jingpang ka la ban ïa u namar ka jingkhrew bad ka jinglwet jong ka bormet na ka daw ka jingshah bom shah tied ha ki Pulit bad dei ha ka 7 tarik, Nohprah 1994 ba u la khlad noh na kane ka sla pyrthei.
Haba ai jingkren ha kane ka sngi, ka para jong u Bah Bull ka kong Hana Lyndoh, kaba pynpaw ba ha shwa ba kan wan sha ka jingïalang, ka ïohi paw ïa u bah Bull ha jingphohsniew ba u la wan rung ha iing da kaba rah ryngkat ka lama jong ka KSU bad ka ka ong ruh ba ka jingïohipaw jong ka lyngba ka jingphohsniew ka pyni ba ka KSU kan dang ieng rasong.
