Nongstoiñ, Naiwieng, 09: Ka jingïoh jong ka shnong Pyndengrei ïa ka ïing dorbar kaba thymmai kaba la shna ha ka jinglut kaba shi klur arphew phra lak tyngka, ka la long ka jingmyntoi kaba khraw ïa ki paitbah ïa ka dorbar shnong ha kiba bun ki liang kum ha kaba pynlong ïa ka dorbar shnong bad kiwei kiwei ki kynja jingïalang kiba heh.
Ïa katei ka ïing dorbar la shna ha ka jaka jong ka shnong kaba la tip kum ka Domthyrnang kaba don marjan bad ka kudam khaw jong ka Food Corporation of India. Ïa katei ka ïing dorbar la plie ha ka 8 tarik mynta u bnai da u bah Gabriel Wahlang MLA ka Nongstoiñ, u ba dei ruh u nongshong shnong ba pura jong katei ka shnong.
Ka shnong pyndengrei ka dei ruh ka shong kaba la heh kaba kynthup ïa ki kyntoit shnong kum ka Thadwang, Mawkhmahwir, Tiehrit, Mawïong bad Pdengshnong.
Ha katei ka sngi hadien la plie ïa katei katei ka ïngdorbar la pynlong ïa ka jingïalang ha kaba la pynïaid da u bah Michael Marweiñ sordar jong ka shnong, ha ryngkat ka jingïadon lang jong ki nongkitkam shnong, ki dkhot ka Executive dorbar, ki paitbah nongshong shnong kynthei bad shynrang.
Nalor kata la pynshongshit ruh ïalang da ki jingpyni nam ïa ki riam tynrai jong ki nongshong shnong jong ka jylla ki jingrwai da ka kynhun rwai Kids Tarari. U bah Gabriel Wahlang haba ai jingkren u la kyntu ïa ki paitbah nongshong shnong, ba ki dei ban ïatreilang bad ka dorbar shnong na ka bynta ban peit bad sumar ïa katei ka ïing dorbar, namar ba la shna ïa katei ka ïing na ka bynta ba ka dorbar shnong kan pyndonkam ha ka ban shong pyrkhat bad saiñdur ïa ka synshar shnong synshar thaw, ka shongsuk shong saiñ bad ka jingbha jong ki paitbah nongshong shnong baroh kawei.
