Ha ka jinglut ba 28.80 klur mang ka sorkar ban siang rong ïa ki surok ha nongbah Jowai

Jowai, Nohprah 07: Uwei na ki samla Rangbah jong ka sor Jowai u ma Khroo L. Pariat ula ïathuh ba hadien ka jingpan RTI jong u na ka ophis u Executive Engineer PWD (Road) South Jowai Division, Jowai ha kaba ïadei bad ka jingsiang rong ïa ki surok (Jowai Internal road) ha baroh ki shnong bad ki kyntoit kiba don hapoh ka nongbah Jowai la ïoh jingtip ba ka jingjrong ka surok ka long kumba 32 kilo miter tam ha ka jinglut kaba T.28,80,43,810.00 tyngka.
Katkum katei ka RTI la lap ba ka jingshna ha ka ban siang rong ïa ki surok hapoh ka sor Jowai kam ym kynthup lang bad ki nala um bad kane ka jingshna surok ka long tang da kaba siang rong haka jingrben kaba 3 inchi bad la aiti ban pyntrei ha u Contractor ma Rocky Dhar. Ïa kane ka jingpyntrei la dei ban sdang naduh ka 21.09.2022 bad yn pynkut 21.09.2025 bad ka jingheh jong u surok kan neh katjuh hi. Ki surok kiba la mang ban pyntrei hapoh sor Jowai ki don haduh 57 tylli.
U ma K.L Pariat haba kren sha ki lad pathai khubor ula pynsngew ba kane ka jingsiang rong ïa ki surok khlem da kynthup lang ïa ki nala um ka lah ban wanrah jingeh hadien ha bud ynda la poi ka aiom lyiur, kaba lah ban wanrah ïa ka jingjot kloi bad kan long ka jingduh nong kaba khraw ïa ka sor Jowai. Nalor kata sa ka jingmaramot ïa u surok ruh kam don jingïakut eiei katkum ba la kdew ha ka RTI ban kane kan sa wanrah ïa ka jingduh nong shuh shuh.
Shuh shuh ula pynsngew na ka liang ka tnad PWD na ka por sha ka por haba don kino kino ki jingujor ban maramot surok la ïoh ka jubab na katei ka tnad ba kam ju don pisa. Shuh shuh ula ong ba ka don ka jingar tatien ruh katkum ka RTI ba ka jingpyntrei ka dei ban sdang naduh ka 21.9.2022 hynrei haduh mynta ym pat ïohi dak eiei jong ka jingsdang. Halor kane ka sorkar ka dei ban phah pyntrei noh ïa u Contractor ban siang ïa ka rong ha ryngkat ki nala um ha shi lynter jong u surok, ong u ma Pariat.
Lada kane ka sorkar ka don jingmut ban shna surok ne wanrah ki kam pynroi tang ban buh mawnongrim namar ba la jan ka Election u ong kane kam don jingmut satia. Lada ka long kumne ka jingpynshna surok ka long tang shisien san snem kam don jingmyntoi ïa ki paidbah bad ka lah ban wanrah pynban ïa ka jingma ïa ka shnong ka thaw.
Ha ka juh ka por u buh ka jingkyrpad khamtam ïa ki nongshong shnong ka sor Jowai kynthup lang ïa ki nongïalam shnong, ki nongñiah kali kamai bad ki trai kali ba ha ka por ba siang rong ïa ka surok ki dei ban mih shakhmat bad ban sakhi ha ka por ba pyntrei ïa ka surok khnang ba u Contractor bad ka ophis PWD kim ïoh ban leh katba mon khnang ba ka surok kan long kaba neh slem wad hadien jong ka Election ruh.
“U surok u dei u budlum bad ngi don ka jingkyrmen ba ka jingpyntrei ïa u surok ha Jowai kan long kaba janai bad ïa kito ki nala um ba don ha shi lynter dei ban maramot lang”, la ong ma Pariat.Kumba long mynta ki nala um kiba don ha kylleng ki bynta jong ka sor Jowai kila dap lut da ki pipe um kor kiba la tap ia ki nula bad kaba la pynthut ruh ia ka leit ka wan jong ki paidbah. Kumta halor kane ka tnad PWD ka dei ban shna noh ïa ki lynti iaid kjat kiba biang khnang ban suk ki paidbah nongshong shnong.