Ha ka jingïalehkai kaba jwat, pynliem ka Nangkiew Irat ïa ka Shillong Lajong

Shillong, Nailur 08 : Ka Nangkiew Irat SC ka la wanphai da ka nam jop ha ka lympung ïalehkai OC Blue Shillong Premier League (SPL) 2021-22 hadien ba ka la pynliem da 3-2 kol pyrshah ïa ka Shillong Lajong FC ha ka jingïalehkai kaba jwat bha ha ka sngi Palei ha madan Third Ground, Polo, Shillong.
Haba mih madan ha ka sngi Palei, ka Nangkiew Irat ka don ha ka kyrdan kaba san da 13 poiñ katba ka Shillong Lajong ha ka kyrdan kaba hynriew da 11 poiñ. Lyngba katei ka jingjop ka Nangkiew Irat ka la lait ban don ha ka kyrdan jong ka jingshah pynhiar kyrdan. Ha ka jingïalehkai kaba nyngkong ba ki la ïakhun kata ha ka 28 tarik Jylliew kitei ki ar tylli ki team ki la ïakhaid da kaba thep mar shi kol.
Haba phai pat sha ka jingïalehkai ha kane ka kylla kaba ar ne second leg, ka jingïalehkai ka long kaba mar ïabam bad dei ka Shillong Lajong kaba la ïoh ban pynkhih jar nynkong ba la thep da u Ioanis Suchen ha ka minit ba 14 jong ka kylla step shwa ba u Banshan Nongdhar u thep ïa ka kol pynïakhaid na bynta ka Nangkiew Irat lyngba ka penalty ha ka minit ba 41 jong ka jingïalehkai.
Ha ka jingïalehkai jong ka kylla miet, kumba baroh ar ki hap ban jop khnang ban lait na ka jingshah pynhiar kyrdan ha kaba ki la ïakhun tyngeh bad mar ïabiang bor bha la ka long ha ka liang ka pashat bad pynshat bol. Hapdeng ka jingïakhun kaba mar ïakhaid, u Rapborlang Marweiñ u la ïoh ban thep ïa ka shi kol na bynta ka Nangkiew Irat kaba la tam da 2-1 kol.
Lyngba kitei ki ar kol ka la nang ai mynsiem ïa ka kynhun kaba la nang pynskhem bha ïa ka bynta ba shadien bad ñion sha ka kut jong ka Shillong Lajong bad da katei ka rukom ïalehkai ha ka minit ba 62 u Pynche Tyngkan u la ïoh ban thep ïa ka kol kaba lai na bynta ka Nangkiew Irat kaba la nang pynskhem ïa ka kynhun ban khur jingjop.
Ka jingïalehkai ka la nang ïathem ha baroh arliang, ki rangïalehkai ka Shillong Lajong ruh ki khlem duh mynsiem bad ïakhun tyngeh beit triang hynrei ki khlem lah ban pyndep ha ka liang ka thep kol bad dei tad haduh ka jingïalehkai jong ka minit ba 85 u Ïohbor L Lyngkhoi u la ïoh ban thep ïa ka shi kol hynrei namar ba ka por ka la lyngkot eh, ka Nangkiew Irat ka la lah ban khanglad ïa ka jingthep kol ha kaba ka la lah ban pynliem syndon da 3-2 kol.
Mynta ka sngi Thohdieng ka jingïalehkai kan long hapdeng ka Langsning FC kaba don ha ka kyrdan kaba ar pyrshah ïa ka Rangdajied United FC kaba don ha ka kyrdan kaba lai. Baroh ar kitei ki team ki donkam ban jop ban ïoh ïakhun ban knieh nam lahduh. Kat haduh mynta ka Mawlai SC ka bat kyrdan ba hakhlieh da kaba kamai 29 poiñ na ki 11 sien ïalehkai katba ka Langsning bad ka Rangdajied ki kamai mar 21 poiñ.