Ha ka jingïaleh ngi kyrmen ban poi beit sha ka thong, ong ki kyrtong na ki Constituency

Mawkyrwat, Rymphang, 21: Ki kyrtong kiba la ïa ai reng ha kane ka jingïakhun ban long ki nongmihkhmat sha ka Khasi Hills Autonomous District Council (KHADC) ki la ïa pyni ïa la ki jong ki nia hadien ba ki la pyndep ïa ka jingthep ïa ki vote jong ki ha la ki jong ki polling station.
Ki la ai khublei ïa ki paidbah kiba la mih shakhmat naduh dang step ban leit jied ïa ki kyrtong ba ki ki i mon ba kin long kita ki nongmihkhmat sha ka KHADC bad ba kin sa trei ruh ïa ki kam na ka bynta ka bha ka miat ka roi ka par jong ki paidbah nangne shakhmat lada ki nongïaleh ne ki kyrtong kin poi sha ka thong jong ka jingjop.
Haba kren sha ki lad pathai khubor, ki kyrtong napoh ka Mawkyrwat bad na Langrin District Council Constituency ki ong ba ki don shisha ka jingkyrmen ban jop ha kane ka jingïakhun namar ki paidbah ki la ai shisha kata ka jingkyrshan jong ki naduh ba ki dang don ha ki kynta jong ka jingïalap elekshon.
Haba ki kren kum ka jingaimynsiem na ka bynta ki paidbah ba kin mih shakhmat ban pyndep ïa la ka hok jong ki, na ka liang ki kyrtong ki la kyntu ïa ki paidbah nongthep vote ba kim dei ban pynleh noh ei ïa ka vote namar kane ka MDC Election ka long kaba donkam haduh katta katta ban long bynta jong ka jingai jingïada ïa ka jaidbynriew, jied ruh ïa ki nongmihkhmat da kaba peit ïa ki nongrim ba shisha ym ba kin jied da ka jingsngew khnang ba yn ïoh ïa ki nongshynshar ba tip-briew tip-blei bad ba kin shakri ïa u paidbah lyngba ki nongrim kiba skhem.
Kum ban shu pynkynmaw ba ki kyrtong kiba ïa khun na Mawkyrwat District Council Constituency ki long u bah Medalsing Lyngdoh na ka Indian National Congress (INC), u bah Carnes Sohshang na ka National Peoples’ Party (NPP), u bah Jessland Roy Nongsiej na ka United Democratic Party (UDP), u bah Pynkhraw Kharjahrin na ka Voice of the Peoples’ Party (VPP), u Polanding Sohphoh na ka Hill State People’s Democratic Party (HSPDP) bad u bah Baristar Paul Thyrniang na ka ka Khun Hynniewtrep National Awakening Movement (KHNAM).
Katba na Langrin District Council Constituency ki long u bah Pherdonnam Rngaid na ka Indian National Congress (INC), u bah Pius Marweiñ na ka United Democratic Party (UDP), u bah Mandilos Nongbri na ka National Peoples’ Party (NPP), u bah Overlin Imiong na ka Voice of the Peoples’ Party (VPP) bad u bah Lewis Janong Sooting na ka Bharatiya Janata Party (BJP).