Ha ka jingïakren pynbeit pud bad ka Assam yn rah lang ïa ka mat jong ka Baikam

Shillong, Naitung, 23 : U Myntri Rangbah ka Jylla u Conrad K. Sangma ha ka sngi Thohdieng u la ong ba ka jingtyrwa jong ka shnong Baikam yn sa ïakren biang ha ka jingïakren pynbeit pud hapdeng ka Regional Committee jong ka Jylla Meghalaya bad ka Assam.
“Ngi la ïakren ïa kane bad ka Assam bad ngin sa pynsngew ïa kane ka jingtyrwa ha ka jingïalang,”la ong u Sangma ha ka jingïakren bad ki lad pathai khubor haba jubab ïa ka jingkyrpad jong ki paidbah ka shnong Baikam ban don hapoh u pud u sam jong ka Meghalaya.
U Myntri Rangbah u la pyntip ba ïa kane ka kam yn sa rah da u Symbud Myntri Rangbah Bah Sniawbhalang Dhar uba dei ruh u Chairman jong ka Regional Committee.
Dang shen mynta ka taiew, u Bah Dhar u la pyntip ba la bthah ïa u Deputy Commissioners jong ka East Jaiñtia Hills bad ka Cachar District ban leit sorjamin ïa ka shnong Baikam bad ban phah ïa ka kaiphod sha ki Regional Committee jong ka Jylla Meghalaya bad ka Assam. Ïa kane ka rai la shim ha ka jingïalang kaba la long dang shen ha ka shnong Umkiang, hapdeng ki nongmihkhmat na ka jylla Meghalaya bad Assam ban ïathir ïatai halor ki jingïapynbeit pud.
“Baroh arngut ki Deputy Commisisoner jong ka East Jaiñtia Hills bad ka Cachar kin sa leit sorjamin bad kin sa phah ïa ka kaiphod sha ki dkhot ka Regional Committee jong ka Meghalaya bad Assam. Hadien kata, ngin sa phah ïa ka kaiphod sha ki Sorkar Jylla bad sha ki arngut ki Myntri Rangbah ban shim rai halor kane ka kam,” u la ong.
Katkum ka jingong jong u, ka shnong Baikam village (kaba hap hapoh ka Ratacherra Sector) ka don kumba 37 tylli ki rympei ing kiba dei ki Khasi-Pnar bad ïa mynta kane ka shnong ka hap sha ka jylla Assam.