Shillong, Nohprah 13 : Ka Jylla Meghalaya kala ïoh mynta ïa la ka jong ka University ne State University ba nyngkong eh hadien ka jingdap 50 snem ka jingïoh ïa la ka jong ka Jylla ba pura. Kane ka State University ka dei ka Captain Williamson Sangma State University kaba la pynkylla na ka Captain Williamson Sangma Technical University.
Kane ka dei ka rai ba la shim da ka Sorkar Meghalaya Democratic Alliance (MDA) ha ka jingïa lang jong ka Kynhun Myntri ba long hynne ka sngi ba-ar.
Haba ïakren bad ki nongthoh khubor, u Myntri Rangbah ka Jylla ula pynbna ba ka Captain Williamson Sangma Technical University kan kylla noh sha ka Captain Williamson Sangma State University.
U pyntip ba ka Kynhun Myntri kala ai jingmynjur ïa ki jingpynkylla ha ka Ain jong kane ka University bad la mynjur ïa ka Ordinance ba kan treikam noh.
“ïa kane ngi la leh namar ka Jylla kam don satia ïa la ka jong ka State University bad namar kane ka daw, ngi shem ba baroh ki College ki hap ban pynïasoh ïalade sha ka NEHU. Naba ngi la don ïa ka Captain Williamson Sangma Technical University, kumta ka Kynhun Myntri ka sngewdei ban pynïar ïa ka jingtreikam jong kane ka Technical University sha ka State University” ong u Conrad.
Kat kum ka jingong jong u, ki College kiba don ha Jylla mynta kila lah ban jied ha kaban pynïasoh sha kane ka State University ha ka jaka jong ka NEHU.
“Ka jingthmu ba hakhmat eh ka long ban pynïar ïa kane ka State University ym tang jong ka laiñ pule Technical hynrei kan kynthup ruh ïa kiwei kiwei ki tnad pule” ula ong.
“Shisien ba la treikam kane, ki kyndon bala buh da ka Sorkar Pdeng ba kynthup ïa ka CUET Exam kaba pynlong kongsan ha ki University ka Sorkar Pdeng, kan nym treikam shuh shisien ba ki College kila pynïasoh sha ka Captain Williamson Sangma State University” ula bynrap.
Ka Kynhun Myntri kala rai ruh ban sdang noh ïa ka laiñ pule BA bad B.Com da kaba pynkha haduh 39 tylli ki Post nonghikai bad ki Nongtrei ha ka College of Teacher’s Education, Tura.
“ïa kane la leh kat kum ka Education Policy ba thymmai, kaba pynlong kongsan ïa ki College ba kin don ïa ki laiñ pule bapher bapher. Namar kane, khnang ba ka College of Teacher’s Education, Tura, kan lah ban ïaid shakhmat kat kum kane ka Education Policy ba thymmai, kine ki laiñ pule BA bad B.Com kin sa sdang noh” pyntip u Myntri Rangbah.
