Ha ka Ïingdorbar Synrai 2025 yn sa lah ban plie noh ïa ka Ïingdorbar thaw aiñ thymmai

Shillong, Nohprah 04: U Lamphang ka Ïingdorbar Thaw aiñ ka jylla u Thomas A. Sangma, ha ka sngi Balang u la lum ka jingïalang jong ka High-Power Committee (HPC) ban bishar ha kaba ïadei bad ki kam kiba la ïaid na ka bynta ban tei ïa ka Ïingdorbar kaba thymmai ha Mawdiangdiang.
Ha kane ka jingïalang la shim bynta lang da u Myntri Rangbah ka jylla u Conrad K. Sangma, u Symbud Myntri Rangbah ka jylla u Bah Prestone Tynsong (in charge of Parliamentary Affairs and PWD-Building) bad u Bah Sniawbhalang Dhar (in charge of Urban Affairs), nangta u nongïalam ka liang pyrshah u Dr Mukul Sangma, nangta ki MLA kiba kynthup ïa u Bah Charles Pyngrope, u Bah Lahkmen Rymbui, bad u Bah Banteidor Lyngdoh, u Chief Secretary Bah D.P. Wahlang, IAS, u Commissioner ka Assembly bad Secretary u Dr. Andrew Simons, nalor kiwei pat ki heh ophisar.
Halor kane ka jingleit jngoh na ka liang u Lamphang u la ong ba la pynjlan biang na ka bynta ban tei pyndep ïa kane ka Ïingdorbar kaba thymmai da ka jingthmu ruh ban lah ban plie noh hapoh ka Ïingdorbar synrai ka ban long ha u snem 2025. Ka jingslem ban tei ïa kane ka ïingdorbar kaba thymmai ka la long ruh na ka daw jong ka jingtei ïa u dome, ha kaba donkam ban pynleit jingmut bha khnang ba kan long kaba biang nadong shadong.
“Ka High-Power Committee meeting kaba la long mynta ka sngi ka la long kaba ïaid beit ïaid ryntih bad da ka jingsngewkhia ngi la lah ban shim ïa katto katne ki rai bad kumba la ïohi kane ka kam ka la long kaba sngewhun hynrei ka kam ka dang long kaba suki bha na ka daw ba donkam ban pynwandur bha khamtam hapoh ka main hall batei ïa u dome. Ngin ym lah ban pynsted ïa ka kam naba ïoh ka mih biang ïa ka jingjia kaba sngewsih,” ong u Lamphang ka Ïingdorbar Thaw Aiñ ka jylla.
Na ka liang jong u Lamphang u la ong, “Na ka bynta ki lad jingtei na ka liang ka Ïingdorbar ka la dep ban buh ïa ki engineer kiba dei ban khmih ïa kane ka kam. Ha kaba sdang la khmih lynti ban ïoh ban pynlong ïa ka dorbar mang tyngka ha kane ka ïingdorbar kaba thymmai, hynrei sngewsih pat ba ym pat lah ban pyndep ïa ki kam kumba la khmih lynti bad dei na kane kam shym la shah ïa ngi ban leh kumne. Bad dei halor kane ba la khmih lynti bad thmu ruh ban plie ïa kane ka jingtei ha shwa ka Ïingdorbar synrai ka ban long ha ka snem 2025.”
Haba ong ba ka jingtei ïa u dome ka la long ka daw ba slem ban pyndep ïa kane ka kam u Lamphang u la ong, “Ki kam kiba kongsan halor kane ka jingpynslem kawei ka dei ka jingtei ïa u dome. Nalor ki jingtei kiba kongsan kiba la shim ïa ka por ban pyndep kloi.”
Ha kawei pat ka liang u Myntri Rangbah ka jylla u Conrad K. Sangma u la banjur halor ka jingdonkam ban don ki rukom pyrkhat kiba biang khnang ban lait na kino kino ki jingjia ba sngewsih. “Ka kam ka la ïaid bha hynrei ngi mad ïa kiba bun ki jingeh. Ki Engineer na Public Works Department (PWD), Project Management Consultant (PMC), bad ki contractor ki la shong bun ki jingïalang ban khmih bniah ïa ka kam. Na ka liang ka HPC ka la mynjur ban pynjlan biang sa kumba 100 sngi khnang ban lah ban pynlong ïa ka dorbar mang tyngka kumba la thmu ha ka por ba sdang. Hynrei kane ka la shu sah ha ka jingkyrmen ban lah ban pyndep ïa kane ka project ha shwa ka Ïingdorbar Synrai jong u snem 2025,” u la ong.
Haba batai halor ki jingdonkam ban pynkylla ïa ka jingohshrong ïa u dome bad ki tiar kiba donkam, u Myntri Rangbah u la ong, “U dome ba la ohshrong mynshwa la pynsangeh noh naba u dei uba khia haduh 3,000 metric ton. Mynta une u dome u la hiar ka jingkhia kumba 85 metric ton. Kane ka la ïarap ban lait na kino kino ki jingma, kaba kynthup na ka jinglait ka jingpei um slap bad kiwei kiwei.”