Shillong, Nohprah, 11: Ki nongïalam jong ka Regional Democratic Alliance (RDA) kaba long ka kynhun jong ka Hill State Peoples Democratic Party (HSPDP) bad ka United Democratic Party (UDP) ha ka sngi Balang ki la shim ïa ka rai ban ïaid la ka jong ka lynti ha ka elekshon MDC ka ban sa long.
U Chairman jong ka RDA Bah Metbah Lyngdoh uba long ruh u President jong ka UDP ha ka jingïakren bad ki lad pathai khubor hadien ba la wai ka jingïalang u la ong, “ngi la shim ïa ka rai ha kane ka elekshon MDC ba ka UDP bad ka HSPDP kin ïaid la ka jong ka lynti kaba mut ngin ym ïakhun ïa ka elekshon da ka RDA hynrei ka mynsiem ïatreilang hapoh ka RDA kan dang bteng kumba ka bteng baroh shikatta bad mynta ruh kumjuh.”
“Ngi don da ka jingïasngewthuh jingmut kaba shai khlem da ka don ïa kano kano ka jingïakynad ne ka jingïakdewkti ne ba ka don ka jingïapra hapdeng ki nongïalam jong kine ki ar tylli ki seng saiñpyrthei,” la pynshai u Chairman jong ka RDA.
Haba kylli, u Bah Metbah u la ong, “kum ki nongïalam ka RDA ngi don ka rukom pyrkhat kaba kham pher. Ngi dang pynneh ïa ka kynhun haduh mynta ka long ba ngi ïohi kum ka jylla ki paidbah ki donkam bad ki dawa ïa ka jingïatylli jong ki seng riewlum. Ngi don ki katto katne ki jingïapher, hynrei ki jingshisha kiba ngi hap ban pdiang haba ngi hap ban ïakhun lait noh na ka elekshon ngi sngew donkam kum ki nongïalam jong ki seng riewlum bad ba kino kino ki seng saiñ pyrthei kiba kam ïalade kum ki seng riewlum ngi pdiang sngewbha ba kin wan sha ka miej jong ka RDA ban ïatreilang ryngkat.”
“Kam pher la ka dei ban ïakhun ïa ka elekshon ha ki constituency bad kam pher lada ka don ka jingïapher jingmut hynrei ngin wan sha ka miej jingïakren ïasngewthuh jingmut,” u la ong shuh shuh.
“Ïa mynta ngi la rai ban ngi la long kiba laitluid ban pynieng kyrtong na kino kino ki Constituency,” u la ong.
U President jong ka HSPDP u Bah KP Pangniang haba bynrap u la ong, ba ka jingdon jong ka RDA ka thew beit ban ïada ïa ka jaidbynriew.
U la ong ruh ba ka jingïatreilang jong ka UDP bad ka HSPDP ha ka RDA kumba ka long, ka la paw ruh ha ka jingdawa ban pynbeit ïa u pud u sam, ka jingpynrung ïa ka ktien Khasi ha ka Khyrnit Baphra.
