Ha ka Dorbar Iktiar Paidbah yn ai burom ïa ki Dorbar Shnong, ki dorbar Dong bad kiwei

Shillong, K’ Lyngkot, 10: Ka Khasi Hills Autonomous District Council (KHADC) kan sa pynlong ïa ka Dorbar Iktiar Paidbah ha madan Polo ha ka 18 tarik mynta u bnai, 2025.
Mynshwa ïa kane ka Dorbar Iktiar Paidbah la thmu ban pynlong ha ka 14 tarik u Nohprah, 2024 hynrei la hap ban pynkynriah noh na ki daw bym lah kiar.
Haba ïathuh ïa kane, u chief executive member (CEM) ka KHADC u Bah Pynïaid Sing Syiem u la ong ba ka jingthmu jong kane ka Dorbar Iktiar Paidbah ka long ban ai burom ïa ki Dorbar Shnong, Dorbar Dong, Dorbar Kur, Seng Kynthei/Longkmie bad Seng Samla.
U Bah Syiem u la ong ba ka rai ban pynlong ïa kane ka Dorbar Iktiar Paidbah la shim hadien ka jingïalang kaba la long bad ki dkhot jong ka Federation of Khasi States (FKS), ka Synjuk Ki Rangbah Kur, ka Synjuk Ki Dorbar Kur, Lympung Ki Seng Longkmie/Kynthei, Synjuk Seng Samla Shnong bad kiwei.
“Na ka District Council ka la khot ïa 30 ngut ki nongmihkhmat na manla ki shnong bad ki dong, kynthup ïa ki dkhot jong ki Executive Committee jong ki Dorbar Shnong, Seng Kynthei/Longkmie bad Seng Samla ban wan bad ban shim bynta ha ka Dorbar Iktiar Paidbah ka ban long ha ka 18 tarik mynta u bnai,” ong u Bah Syiem.
U Bah Syiem u la pyntip ba u Lat ka jylla u CH Vijayashankar bad u Chief Justice ka Meghalaya High Court bad ki senior advocate na ka jylla kin sa donlang ha kane ka Dorbar.
“Hadien 72 snem naduh ba la ïoh ïa ka Autonomous District Council la jong, ngi la ïoh ïa la ka jong ka aiñ, kata kadei ka Khasi Hills Autonomous District Administration of Elaka Amendment Act 2023 bad ha kane ka aiñ, ngi la wanrah ïa ka jingpynkylla ïa ka principal act jong ka Elaka Administration 1971 bad da kaba pynrung lang ïa ka Seng Samla, Seng Kynthei bad Seng Longkmie hapoh ka act,” u la bynrap.
U Bah Syiem u la ong ba katkum ka section 8 jong ka sub-section 11, ka la bthah ïa ka Dorbar Shnong bad Dorbar Dong ban pynrung kyrteng ïa baroh ki nongshong shnong bad ban buh ïa ki record jong manla ki longïing bad ïa baroh ki nongshong shnong, ba kynthup ïa ki trai ïing, ki trai khyndew, kiba shongwai, kiba shim wai, ki jaka khaïi, ki dukan, kiba die madan, ki karkhana, ki samla pule, ki nongtrei, ki nongbylla bad kiwei kiwei hapoh ki Shnong.
U CEM u la ong ba ha ka Dorbar, kan don ka jingïakren jingïasyllok halor ka jingpynkylla ïa ka Khasi Hills Autonomous District Khasi Social Customs of Lineage Act 1971.
“Katkum ka jingpynkylla thymmai yn sa don u Registrar ha ophis ban pdiang ïa ki application na ka Kur ban ithuh da ka aiñ kumta ngi kyntu ïa baroh ki Seng Kur ban wan shakhmat bad ban kynduh ïa u Registrar bad ban pynrung kyrteng ïa la ki Kur bad ban ïoh ka jingithuh katkum ka aiñ,” u la bynrap.