Ha ka Bye-Election ki ïakhun pyrshah hynrei mynta ki treilang ban pynjop NPP na Shella

Shillong, Jymmang : Ka NPP Shella constituency ka la ïoh ban khring sa uwei u rangbah uba dei u nongïalam jong ka Congress, Bah Mosjo Wanswett, uba dei ruh uwei na ki kyrtong ba aireng ha ka elekshon shiteng samoi na katei ka constituency hadien ka jingkhlad noh jong u MLA ka thaiñ, u Dr. Donkupar Roy.
Ha ka jingpdiang burom ïa utei u rangbah ryngkat kiwei pat ha ka jingïalang kaba heh bha jong ka NPP Shella kaba long ha Saitsohpen ha kane ka sngi Nyngkong, la pynskhem ruh ïa utei u rangbah ban long kum uwei naki Vice President jong ka NPP Shella constituency. U Bah Mosjo uba dei ruh u para trai jong u Bah Leston Wanswett, u kyrtong ba ju shah rem salit ha u Dr. Donkupar ha bun ki elekshon u la aireng na ka tiket PDF ha ka elekshon shiteng samoi kaba long ha u snem 2019.
Na ka liang utei u rangbah haba kren ha katei ka jingïalang u la ong, “Ha ka elekshon shiteng samoi manga bad i Kong Grace ngi dei ki kyrtong hynrei mynta nga sngewtynnad ba ngi ïoh pat ban ïatrei lang ha kajuh ka party hapoh ka jingïalam jong u Conrad Sangma bad u Bah Prestone Tynsong.”
Katkum ka jingïathuh jong u, ha kine ki khyndiat snem ka NPP kam pat da suhthied bha hynrei mynta pat hapoh ka jingïalam jong ka Kong Grace ki paidbah ki la mih shakhmat ban ïatrei lang ha katei ka party.
“Ha Shella ki paidbah la slem bha ki la don ka jingangnud ban kylliang noh ïa ki nongmihkhmat hynrei neh beit na kajuh ka party, kata na ka UDP. Hynrei mynta ngi don ka jingkyrmen ba da ka jingkyrshan borbah ki paidbah ngin lah ban jop ha kane ka elekshon ban wan,” u la bynrap biang.
Na ka liang u Bah Prestone Tynsong, National Vice President ka NPP haba kren ha katei ka jingïalang u la pynbna paidbah ruh ba la pynskhem ïa ka Kong Grace Kharpuri kum ka kyrtong jong ka party ban aireng ha kane ka elekshon MLA ha u 2023.
Kumban shu kdew hangne, ha katei ka por ba don ka elekshon shiteng samoi, ka Kong Grace watla ka iakhun kum ka kyrtong shimet hynrei ka la wan ba-ar hadien ba u khun jong u Dr. Donkupar Roy u la ïoh ban khur ïa ka jingjop da ka jingkyrshan borbah jong ka NPP ryngkat ka UDP.