Shillong, Naitung 03 : Mar ïa shongthait na ka kam, u Director ka tnad ka Koit ka sorkar jylla, Dr. Aman War ha ka janmiet sngi Saitjaiñ u la pyntikna ba un aireng beit na ka tiket UDP ha ka elekshon MLA kaban long ha u 2023 na North Shillong Constituency.
“Hadien ba nga la shongthait na ka kam, nga la long u ba laitluid. Nga la pyndep ïa i kam ba rit kaba nga trei baroh shi katta bad mynta nga ngeit skhem ba ngan lah ban bteng bad pyndep pat sa ïa ka kam kaba kham heh,” u la ong haba kren bad ki lad pathai khubor hadien ka jingïalang jong ka UDP North Shillong kaba long ha Mawkhar.
Watla na ka liang ka UDP kam pat pynbna paidbah ïa u Dr. Aman kum u kyrtong, hynrei la ïoh jingtip ba ïa kane ka party kan sa leh ha ka 06 tarik mynta u bnai ha ka jingïalang kaban long ha Mawkhar hi.
Haba jubab halor ka jingkylli, utei u DHS barim u la ong, “Nga dei u nong Mawkhar bad nga heh nga san hangne. Ka jingmih jongnga sha kane ka lympung kadei lyngba ka jingkyntu jong kiba bun, ka jingkyrkhu jong u Blei Trai Kynrad, bad ruh ka kti kamon kti kadiang jong ki paralok bad ka jingskhem na ka iing ka sem khamtam i Mei.”
Shuh shuh u la ong ruh ba kawei pat ka bynta kaba pynlong ïa u ban mih shakhmat kadei ruh na ka bynta ka bha ka miat jong u paidbah jong ka North Shillong Constituency bad ruh na bynta ka jylla baroh kawei.
U ong ruh ba ka jingjied jong u ïa ka party UDP kadei namar u ïohi ba kane ka party kadei kaba skhem ka nongrim treikam bad kaba ïahap bad ka thong treikam jong u.
Da kaba kubur ba ka North Shillong kadei ka constituency kaba khleh kiwei pat ki Jaidbynriew, u Dr. Aman War u ong ba ka UDP kadei kaba paka tam na bynta kane bad shisien ba u la mih shakhmat u don ka jingskhem ba ka kam ruh kan ïaid shakhmat.
